Еліміздің дамуының негізгі тетігі – аграрлық сала болғандықтан, ауыл шаруашылығы мамандықтарының мәртебесiн арттыру, бәсекеге қабiлеттi мамандарды даярлау, кәсіби шеберлiкке нақты қадам жасау, сондай- ақ кәсіби құзыреттiлiктердi дамыту мен жоғары кәсіби білікті мамандардың беделін жоғарылату – бүгінгі күннің басты талабы. Осы орайда, Меркі ауданында екі күн бойы ауыл шаруашылығы мамандықтары бойынша студенттердің біліктілігін арттыру мақсатында «AgroSkills-2022» республикалық кәсіби шеберлік чемпионаты өткiзілді. Байқауға еліміздің 9 өңірінен, мәселен Түркістан, Алматы, Қызылорда, Жамбыл, Жетісу, Шығыс Қазақстан, Ақтөбе және Батыс Қазақстан облыстарынан келген 11 студент пен олардың жетекшілері қатысты. Байқау қарсаңында алдымен №9 Меркі колледжі мен «Мерагро холдинг Ltd» жауапкершілігі шектеулі серіктестігі арасында студенттер мен түлектерге мансаптық дағды қалыптастыруға, студенттердің практикадан өтуі мен жұмысқа орналасуына көмек беру және «Мақсатты кадр даярлау» мемлекеттік бағдарламасын іске асыру мақсатында «Ынтымақтастық туралы меморандумға» қол қойылды. Бес модульден тұратын байқауда қатысушылар ауыл шаруашылығы техникаларын пайдалану жолдарынан бақ сынасты. Оқудағы алған білімдерін тәжірибе жүзінде сынаған студенттер «Jon Deеre-550» астық жинайтын комбайнымен жұмыс, табиғи және екпе шөптерді баулауға арналған «Sipma» пресін жұмысқа дайындау, байлау аппаратына жіпті сабақтау, табиғи шөпті престеу, «МТЗ-82» тракторымен «Sipma» шөп баулағышты тасымалдаушы күйге қойып, артқа қарай қақпаға айдап кіргізу, «МТЗ-1221» тракторын аспалы соқасымен сегіздік айналымнан жүріп өту, «Беларусь-1221» тракторына агрегатталған «ПОН-4-45» соқасын тіркеп жер жырту бойынша өздерінің біліктілік деңгейлерін көрсетті. Байқаудың қорытындысы бойынша, бірінші орынды 5 модульді кезең- кезеңімен техникалық қауіпсіздік ережелеріне сай жоғары дәрежеде орындаған №9 Меркі колледжінің студенті Зейнула Мухамед жеңіп алды. Екінші орынды Түркістан облысы атынан қатысқан Азизбек Юлдашев пен Шығыс Қазақстан облысынан келген Жандос Құрбанәліұлы иеленді. Ал үшінші орынның тұғырынан Батыс Қазақстан облысынан Қуаныш Мұхитов, Қызылорда облысынан Ердос Тәжібаев, Жетісу облысынан келген Тайрхан Қасымхан көрінді. Республикалық байқауда бақ сынасқан барлық қатысушылар арнайы кубокпен, әртүрлі дәрежелі дипломмен, медальдармен және бағалы сыйлықтармен марапатталса, олардың жетекшілеріне Алғыс хаттар мен ақшалай сертификаттар табысталды.  

Қазыбек КАМАЛ,

Меркі ауданы әкімінің баспасөз қызметі