Еліміздің ғылым және білім министрлігінің қолдауымен 2022-2024 жылдарға арналған «Жас ғалым» жобасы бойынша жас ғалым-постдокторанттардың іргелі және қолданбалы зерттеулерін гранттық қаржыландыру конкурсында М.Х.Дулати атындағы Тараз өңірлік университетінің бес бірдей жас ғалымы жеңіске жетті. Жас зерттеушілерге ғылыми-зерттеулер жүргізіп, экономиканың әр саласын дамытуға септігі тиетін тың жобаларын қолданысқа енгізуге мүмкіндік беретін конкурста М.Х.Дулати атындағы Тараз өңірлік университетінің ғалымдары әрқайсысы 19 миллион теңгеден грант ұтып алды. Соның бірі – «Ә.С.Ахметов атындағы Наноинженерлік зерттеу әдістері» ғылыми зертханасының қызметкері, магистр Ерлан Атенов. Конкурста жас ғалымның «Топырақ және құрылыс материалдарын қосу арқылы діңгегі кеңейтілген қадаларды орнатудың тиімді технологиясын әзірлеу» жобасы үздік деп танылды. Сондай-ақ «Техникалық физика» кафедрасының аға оқытушысы Толқын Қасенова да қаржыландыру сомасы 19 миллион теңгені құрайтын жобаның жеңімпазы атанғанын айта кету керек. Жамбылдық жас ғалымның ұсынған жобасын шетелдік сарапшылар жоғары бағалаған. Ал «Су шаруашылығы және табиғатқа үйлестіру» институтының «Механика және машина жасау» кафедрасының аға оқытушысы Роллан Нүсіпәлидің жетістікке жеткізген жобасы «Желдің бағыты тұрақты аймақтарға арналған жел энергетикалық қондырғысының жетілдірілген конструкциясын әзірлеуге» бағытталған. Жас ғалым Нұржан Шаншабаев құрылыстағы қадалы іргетастың тиімді формасын ойлап тауып, үш жыл бойы осы жобаны егжей-тегжейлі зерттеген. Үнемі ізденісте жүретін оның конкурсқа ұсынған жобасы да үздік деп танылып отыр. «Химия және химиялық технология» факультетінің аға оқытушысы, химия магистрі Рабиға Құдайбергенованың да ұсынған жобасы гранттық қаржыландыру конкурсында ғалымдардың қызығушылығын туғызғанын айта кеткен жөн. Сарапшылар тарапынан жоғары бағаланған еңбек 19 миллион теңгеге қаржыландырылып отыр.  

М.Х.Дулати атындағы

Тараз өңірлік университетінің

медиа-қызметі.