Облыс әкімі Нұржан Нұржігітов облыстық ведомствоаралық психологиялық- медициналық-педагогикалық консультациялар қызметкерлеріне арнайы көліктердің кілтін табыс етті. «LADA Largus» маркалы 5 қызметтік автокөліктің кілтін табыс ету рәсімі аутизм дертіне шалдыққан балаларды қолдауға бағытталған «Асыл Мирас» орталығында өтті. Қызметтік автокөліктер Қордай, Меркі, Талас және Шу аудандық психологиялық- медициналық-педагогикалық консультациялар орталықтарына бұйырды.
– Мүгедектерді әлеуметтік қорғау, олардың құқықтарын қамтамасыз ету және өмір сүру сапасын жақсарту мақсатында мемлекетіміз тұрақты түрде шаралар қабылдауда. Бұл салада 29 арнайы мекеме жұмыс істейді. Білім беру ұйымдарында ерекше қажеттіліктері бар балалар үшін білімге қолжетімділік қамтамасыз етіледі. Жалпы білім беретін мектептерде осы оқу жылында ерекше білім беру қажеттіліктері бар 3000-нан астам бала оқиды. Балалар жылы аясында бірқатар ауқымды іс-шаралар өткізіледі. Жарқын мысалдардың бірі – «Асыл Мирас» орталығының ашылуы. Ата-анасының қамқорлығынсыз қалған балаларды әлеуметтік қолдау бойынша «Мейірім» жобасы табысты іске асырылуда. Қазір жоба аясында 1400-ге жуық бала қамқорлық көріп отыр. Меценаттар мен кәсіп- керлер оларға қаржылық қолдау көрсетеді. Біз балалардың жан- жақты және үйлесімді дамуы үшін жағдай жасаймыз, – деді Нұржан Нұржігітов.
Ал психологиялық-медициналық-педагогикалық консультация орталығы меңгерушісінің міндетін атқарушы Гүлмира Құлмашева өңірде осындай алты кеңес бар екенін, олар барлық ауданды қамти отырып жұмыс істеп жатқанын айтады. Енді орталық қызметкерлері, атап айтқанда психологтар мен логопедтер алыс ауылдарда арнайы автокөліктермен алаңсыз қатынайтын болады.
Айта кетейік, «Асыл Мирас» орталығы «Болат Өтемұратов қорының» қолдауымен ашылған болатын. Автокөлік кілтін табыс еткен соң өңір басшысы орталық жұмысымен танысты. 18 жасқа дейінгі аутист балаларды оңалтатын мекемеде 13 арнайы кабинет 6 бағыттық бағдарлама бойынша жұмыс істейді.
