Саясат
Өртті сөндіруге арналған тікұшақ паркі үш есе ұлғайтылады - Әлихан Смайылов
- author «Ақ жол»
- 18 қыркүйек, 2022
- 286
![Өртті сөндіруге арналған тікұшақ паркі үш есе ұлғайтылады - Әлихан Смайылов](https://aqjolgazet.kz/uploads/resized-images/2022/09/a30b67b9-9c3d-48af-b27f-6a924ffb3b8b.jpeg)
Өртті сөндіруге арналған тікұшақ паркі үш есе ұлғайтылады - Әлихан Смайылов
Қостанай облысына жұмыс сапарымен барған ҚР Премьер-Министрі Әлихан Смайылов орталық мемлекеттік органдар мен әкімдік басшыларының қатысуымен өңірдің кешенді әлеуметтік-экономикалық даму мәселелері жөнінде кеңес өткізді.
Облыс әкімі Архимед Мұхамбетов, төтенше жағдайлар министрі Юрий Ильин, индустрия және инфрақұрылымдық даму министрі Қайырбек Өскенбаев, экология, геология және табиғи ресурстар министрі Серікқали Брекешев, ауыл шаруашылығы министрі Ербол Қарашөкеев, сондай-ақ ұлттық экономика вице-министрі Бауыржан Омарбеков баяндама жасады.
Баяндамашыларды тыңдаған Премьер-Министр жақында Қостанай облысында болған орман өрттері жергілікті тұрғындар мен инфрақұрылымға айтарлықтай зиян келтіргенін, адам өліміне әкелгенін атап өтті. Осыған байланысты Әлихан Смайылов орман шаруашылығы төңірегінде құтқару жұмыстарын жүргізу қажеттігін атап өтті.
«Тікұшақ техникасының жақын жерден су алып, өртті сөндіруін жеңілдету мақсатында орман алқаптарының жанындағы су қоймаларының түбін тереңдету жұмыстарын жүргізу қажет. Біз тікұшақтар паркін үш есе ұлғайту үшін қосымша суқашыртқы құрылғыларды сатып аламыз, оларды өрт сөндіру үшін пайдалануға болады. Бұл Қостанай облысын қоса алғанда, барлық өңірлерге қатысты», — деді Әлихан Смайылов.
Кеңес барысында Премьер-Министр өңір әкімдігінің білім беру саласындағы кемшіліктеріне де назар аударды. Әлихан Смайылов өңірдің 7 мектебінде күрделі жөндеу жұмыстарының аяқталу мерзімінің кешіктірілгенін, соның салдарынан балалар бейімделмеген жерлерде (балабақшалар, мәдениет үйлері, ауыл әкімдіктерінің ғимараттары) оқуға мәжбүр екенін атап өтті. «Бұл проблеманы шешу үшін жедел шаралар қабылдау қажет. Жалпы білім беру саласына жауапкершілікпен қарау керек, өйткені балаларға оқу үшін тиісті жағдайлар жасалуы тиіс», — деп атап өтті Әлихан Смайылов.
Экономикалық мәселелер бойынша Премьер-Министр облыс тұрғындарының әл-ауқатын арттыру үшін бүкіл өңірдің әлеуметтік-экономикалық дамуына серпін бере алатын инвестициялық жобаларды іске қосу бойынша жұмыс жүргізу қажеттігін атап өтті. «Бұл әкімдік басшылығының басты міндеттерінің бірі. Ол үшін мемлекет тарапынан барлық жағдай жасалған, тұрақты негізде қажетті қолдау көрсетіліп жатыр», — деді Әлихан Смайылов.
Оның айтуынша, «Қуатты өңірлер – ел дамуының драйвері» ұлттық жобасы және «Ауыл – ел бесігі» бағдарламасы аясында Қостанай облысына 32 ауылдық елді мекенде 75 жобаны іске асыруға 6,7 млрд теңге бөлінді. Жалпы өңірді дамытуға 2022 жылы республикалық бюджеттен 115,9 млрд теңге, сондай-ақ бюджетті нақтылау аясында тағы 31,7 млрд теңге бөлінді.
![width=](http://aqjolgazet.kz/wp-content/uploads/2022/09/da1783ba-b786-477e-99bc-8eeaad8a2940-300x166.jpeg)
![width=](http://aqjolgazet.kz/wp-content/uploads/2022/09/03178734-ff76-4789-b734-0a6d95573a58-300x169.jpeg)
![width=](http://aqjolgazet.kz/wp-content/uploads/2022/09/2d084afa-bcd6-4e02-a25e-de6ecb3d7226-300x170.jpeg)
«Бұл қаражат ең алдымен әлеуметтік қажеттіліктерге, облыстың инфрақұрылымы мен агроөнеркәсіптік кешенін дамытуға бағытталған. Әкімдік аталған қаражаттың тиімді пайдаланылуын қамтамасыз етуі тиіс», — деп атап өтті Премьер-Министр.Әлихан Смайылов азық-түліктің жетіспеушілігі мен бағасының негізсіз өсуіне жол бермеу бойынша жоспарлы жұмыс жүргізу қажеттігіне де назар аударды. Оның айтуынша, әкімдік осы бағытта қолданыстағы тетіктерді пайдалануды жандандыруы керек. Сонымен қатар Премьер-Министр өңір экономикасын одан әрі әртараптандырудың маңыздылығын атап өтті. Мәселен, 2022 жылы облыста $38 млрд-қа 45 жаңа жобаны іске қосу жоспарланған.
«Инвестициялық жобаларды іске қосу жаңа жұмыс орындарының ашылуына септік етеді. Облыс әкімдігі инвесторлар үшін барлық қажетті жағдайларды жасау және белгіленген жобаларды уақытылы іске қосу жөніндегі жұмысты жалғастыруы керек», — деді Әлихан Смайылов.Қорытындылай келе, Премьер-Министр жылумен жабдықтау жобаларын іске асыруға қаражат бөлу мәселесін пысықтауды, «Қостанай-Денисовка» көлік жолын реконструкциялау жөніндегі жобаны уақытылы қаржыландыруды қамтамасыз етуді, 2022 жылдың соңына дейін жергілікті маңызы бар жолдардың жағдайын жақсарту жөнінде шаралар қабылдауды тапсырды. Бұдан басқа, Әлихан Смайылов облыста болашақта көпфункционалды медициналық мекеме болып ұлғайтылатын жаңа перинаталдық орталық салу мәселесін, Әулиекөл ауданының «Достық» балалар мәдени жазғы сауықтыру кешенін қалпына келтіру үшін қаражат бөлу, сондай-ақ Тобыл қаласында емхана құрылысын қаржыландыру және басқа да бірқатар мәселелерді пысықтауды тапсырды.
Ұқсас жаңалықтар
Ауылды өркендету – азық-түлік қауіпсіздігінің алғышарты
- 5 қыркүйек, 2024
Өзекті мәселелер көтерілген Жолдау
- 5 қыркүйек, 2024
Ақпарат
Алматылық қос азаматтың жазасы жеңілдетілді
- 30 тамыз, 2024
Президент эстрада әншісін «Барыс» орденімен марапаттады
- 22 шілде, 2024
Газетке жазылу
«Aulieata-Media» серіктестігі газетке онлайн жазылу тетігін алғаш «Halyk bank» қосымшасына енгізді