Бауыржан Момышұлы ауылындағы Орталық стадионда футзалдан ел чемпионатының күміс жүлдегері, «Golden Boy» сыйлығының иегері атанған, «Аят» футзал клубының ойыншысы Әбдірәсіл Әбдіманапұлының жүлдесі үшін жасөспірімдер арасында аудандық турнир өтті. Жарысқа Бауыржан Момышұлы ауылы мен ауылдық округтерден келген 60-қа жуық жас аяқдоп шебері қатысты. Тартысты әрі қызықты өткен сайыста әрбір команданың тыңғылықты дайындалып келгені көрініп-ақ тұрды. Аяқдоп аламанының қорытындысы бойынша бірінші орынды №15 Балалар-жасөспірімдер спорт мектебінің құрама командасы жеңіп алса, екінші орын «Акация» футбол клубына бұйырды. Ал жүлделі үшінші орынды №29 орта мектебінің командасы еншіледі. Одан бөлек, жарыста «Үздік шабуылшы» аталымымен №15 Балалар-жасөспірімдер спорт мектебі командасының ойыншысы Нұрқанат Қозыбай марапатталса, №29 орта мектебі командасының ойыншысы Зұлмат Бегімжан «Үздік қорғаушы» деп танылды. Ал «Үздік қақпашы», «Үздік ойыншы» аталымын «Акация» футбол клубының ойыншылары Болатбек Ислам, Мирас Тұрғын иеленді.

Есет ДОСАЛЫ

Жуалы ауданы.