Биылғы мамырда Жамбыл облысының халқы 1152,1 мың адамды құрады. Жыл басынан бері өңір тұрғындарының саны 2,2 мың адамға өсті. Қалалық жерлерде 461,7 мың адам (халықтың жалпы санының 40%-ы), ауылда 690,4 мың адам (60%) тұрады. Бұл туралы облыстық статистика департаментінің басшысы Ерназар Құлтаев айтты. Ол аймақтың гендерлік аспектісінде ерлер мен әйелдер санының арақатынасында тепе- теңдік қалыптасты деуге болатындығын атап өтті. Халықтың жалпы санынан ерлердің үлесі 49,5% (570,4 мың адам), әйелдер 50,5%-ды (581,7 мың адам) құрайды. «Облыста 1000 әйелге есептегенде 980 ерден, оның ішінде қалалық жерде – 909, ауылдық жерде 1031 ерден келеді. 100 қыз балаға орта есеппен 108 ер бала туылады. Біздің өңір тұрғындарының орташа жасы 29,5 жасты құрайды, оның ішінде ерлер – 28,1, әйелдер жасы – 30,9», – деді департамент басшысы. Ерназар Сейтханұлы халықтың күтілетін өмір сүру ұзақтығы былтыр 69,15 жасты, оның ішінде ерлер – 65,41, әйелдер 72,97 жасты құрағанын мәлімдеді. Облыстағы халық санының өсуі, негізінен туу есебінен – табиғи өсімнің артуымен қамтамасыз етіледі. 2022 жылғы қаңтар-сәуірде дүниеге келген бала саны бойынша біздің облыс республикада Түркістан, Алматы облыстары және Нұр-Сұлтан, Алматы және Шымкент қалаларынан кейінгі 6-орында тұр.

 «Aq jol»-Aqparat».