«Дипломмен ауылға» жобасының жүзеге асырылып келе жатқанына он жылдан асты. Жобаның мақсаты – ауылдық елді мекендерге жұмыс істеуге және тұруға келген денсаулық сақтау, білім беру, әлеуметтік қамсыздандыру, мәдениет, спорт және агроөнеркәсіптік кешен мамандарына мемлекет тарапынан қолдау көрсете отырып, білікті кадр тапшылығын шешу. Жоба шеңберінде ұсынылатын әлеуметтік қолдау шаралары «Агроөнеркәсіптік кешенді және ауылдық аумақтарды дамытуды мемлекеттік реттеу туралы» ҚР Заңының 18-бабының 8-тармағымен регламенттелген. Аталған баптың күші тек ауылдық аумақтарды дамытуға бағытталған және қалалық елді мекендерге қолданылмайды. «Дипломмен ауылға» жобасын іске асырудың тиімділігін арттыру мақсатында соңғы 10 жыл ішінде заңнамалық және нормативтік актілерге белгілі бір өзгерістер енгізілген. Өткен жылы тұрғын үй сатып алу немесе салуға бюджеттік несие мөлшері 630 еселік АЕК-тен 1500 еселік АЕК-ке дейін ұлғайтылды. 2012 жылдан бастап әлеуметтік қолдау шаралары ветеринария мамандарына, ал 2014 жылдан бастап агроөнеркәсіптік кешен мамандарына ұсынылады. 2019 жылы көтерме жәрдемақы мөлшері 70 АЕК-тен 100 АЕК-ке дейін ұлғайтылған болатын. Сонымен қатар 2020 жылы ҚР ҰЭМ-нің 2014 жылғы 6 қарашадағы №72 бұйрығына өзгеріс енгізіліп, әлеуметтік қолдау шаралары ауылдар, кенттер, ауылдық округтер әкімдері аппараттарының мемлекеттік қызметшілеріне де қолжетімді болды. Ауылдық елді мекендердегі жұмыс істеуге және тұруға келген мамандарға екі бағытта қолдау көрсетіліп келеді. Атап айтсақ, бірінші бағыт – 100 АЕК (2022 жылы АЕК – 3 063 теңге) мөлшерінде біржолғы көтерме жәрдемақы беру, ағымдағы жылы 306 300 теңгені құрады. Екінші бағыт – қажеттілігіне қарай тұрғын үй сатып алуға немесе салуға 0,01 пайыздық үстемемен 15 жылға дейін 1 500 АЕК немесе 4 594 500 теңге көлемінде жеңілдетілген бюджеттік несие беру. Ал әлеуметтік қолдау шараларын алған маман ауылдық елді мекенде үш жылдан кем емес жұмыс істеуге міндеттеме алады. Өткен жылы 247 маманға тұрғын үй сатып алуға немесе салуға республикалық бюджеттен 1 071,2 миллион теңге бюджеттік несие қарастырылып, 248 маманға бюджеттік несие беріліп, толығымен игерілді. Жергілікті (аудандық) бюджет есебінен 503 маманға біржолғы көтерме жәрдемақысын төлеуге 146,8 миллион теңге қарастырылып, есепті кезеңде 503 маманға 146,8 миллион теңге көтерме жәрдемақы толығымен игерілді. Биыл мамандарды әлеуметтік қолдау шараларын іске асыру үшін, «Дипломмен ауылға» жобасы аясында 290 маман үшін 1 332,5 миллион теңге бюджеттік несие қарастырылып, 2022 жылғы 1 маусымдағы жағдай бойынша 45 маманға тұрғын үй сатып алуға немесе салуға 204,3 миллион теңге несие берілді. Жергілікті (аудандық) бюджет есебінен 507 маманға біржолғы көтерме жәрдемақысын төлеуге 155,9 миллион теңге қарастырылып, есепті кезеңде 203 маманға 62,3 миллион теңге көтерме жәрдемақы беріліп отыр. Бұл жұмыстар бұдан ары да жалғасуда.

Облыс әкімдігі экономика және бюджеттік жоспарлау басқармасы.