Қазақстан дзюдодан Әлем чемпионатында қола жүлдегер атанды
Астана, BAQ.KZ. Нассауда (Германия) дзюдодан жастар арасында өткен Әлем чемпионатында Қазақстан құрамасы аралас командалық сайыста қола медаль жеңіп алды. Қазақстандық дзюдошылар жұбаныш финалында Франция құрамасын 5:3 есебімен ұтып, жарыстың қола жүлдегері атанды. Бұл туралы Дзюдо федерациясының баспасөз қызметі хабарлады.
Әлем чемпионатының ширек финалында Қазақстан Германия құрамасын 5:1 жеңіп, жартылай финалға жолдама алды. Алайда, жартылай финалда Бразилия құрамасына 1:5 есебімен жеңіліп, жарыстың қола жүлдесі үшін күресуге мүмкіндік алған болатын.
Аралас командалық сайыста Қазақстан жастар құрамасының сапында Арслан Есенгел, Бауыржан Нарбаев, Аңсарбек Ғайнуллин, Жанболат Бақытбергенов, Ерасыл Болат, Дінахмет Рыссымбек, Санжар Жаббаров, Ғалия Тынбаева, Ақмарал Науатбек, Аида Карчаева, Мөлдір Нарынова және Камила Берліқаш күресті.
