«Қордай» кеденінің қызметкерлері «Қарасу» бекетінде Кеден одағы аумағынан алтын бұйымдарды заңсыз алып өтпек болған азаматты қолға түсірді. «Көршілес қырғыз елінің азаматы тиісті кедендік декларациясынсыз алтынды заңсыз жолмен елімізге күндізгі сағат 12-лер шамасында алып кіруге тырысқан», – деп хабарлады облыс бойынша кедендік бақылау департаментінің баспасөз қызметі. Кедендік тексеру барысында Қазақстанға бет алған Қырғыз Республикасының С. есімді азаматының басқаруындағы «Мерседес-Бенц» көлігінен зергерлік алтын бұйымдардың 446 жиынтығы табылған. Әр жинақта бір жүзік, екі сырғадан болған. Олардың жалпы салмағы 4 килограмға жуық. «Қордай» кеденінде осы факті бойынша тергеу алды шаралары басталып кетті.

Шынар САҒИЕВА, «Ақ жол».