Мәдениет министрі, юнеско және исеско істері жөніндегі Ұлттық комиссияның төрағасы Арыстанбек Мұхамедиұлы: Дохада өткен ЮНЕСКО кеңесінде Ұлы Жібек жолының бірінші бағыты тізімге алынды. Кеңес аясында Қырғызстан және Қытай мемлекеттерімен бірлесе әзір­лен­ген «Ұлы Жібек жолы: Тянь-Шань дәлізі» атты сериялық трансшекаралық номинациясының шеңберінде ЮНЕСКО Бүкіләлемдік мұра тізіміне енгізілген сегіз қазақстандық нысандарының (Қаялық, Қарамерген, Талғар, Ақтөбе (Степнинское), Ақыртас, Құлан, Қостөбе, Өрнек) және ЮНЕСКО Бүкіләлемдік биосфералық резерваттар жүйесіне енген «Катонқарағай» мемлекеттік ұлттық табиғи паркі мен «Ақжайық» биосфералық аумағының сертификаттарын табыстау көзделіп отыр. Біз әрине, мұндай кең көлемдегі басқосуды барынша пайдаланып қалуға тырысуымыз керек. Сонымен бірге, ежелгі Отырар, ежелгі Тараз аталымдарын тізімге қосуға үлкен жұмыстар жүргізілуде. Бұл «Мәдени мұра» бағдарламасы бойынша атқарылған жұмыстың нәтижесі.