АСТАНА. ҚазАқпарат - «Kazakh Tourism» компаниясы және «Атамекен» ұлттық кәсіпкерлер палатасы испандық сапа жүйесі тәрізді туризм нысандарына арналған стандарттарды әзірлеп жатыр, деп хабарлайды ҚазАқпарат тілшісі. «Бурабайда туристерге арналған нысан өте көп. Бірақ, сапалық тұрғыда олардың көпшілігі ең төменгі стандартқа да сай келмейді. Әйтсе де, олар қонақ қабылдап, ақша тауып отыр. Сондықтан, бизнесті ырықтандыруға қарамастан, минималды стандарттар түсінігін енгізу қажет. Бұл стандартқа сәйкес келмейтін нысандардың жұмыс істеуіне жол бермеу керек. Яғни, нысан сала бергенше, қолда бар нысандардың стандартын көтерген абзал. Осының өзі туристің қауіпсіздігі мен жайлылығын қамтамасыз етеді», - деді Тимур Дүйсенғалиев Астанада Қазақстанның іскерлік туризміне арналған жиналыста. Оның айтуынша, стандартта қонақ үй нөмірінің өлшемі, көрсетілетін қызмет түрлері нақты көрсетіледі. «Егер қонақ үйде бір жұлдыз болса, нысан сол бір жұлдызға лайық болсын. Бұл екі жұлдызды қонақ үй, хостел, қонақ үй, кемпингтерге де қатысты. Сонда туристке бәрі түсінікті болады және күткен болжамы ақталады», - деді Т. Дүйсенғалиев. Аталған стандарттар 2019 жылы Алматы қаласы мен Алматы облысында пилоттық режімде енгізіледі.

kazinform.kz