Қазақстандағы цифрландыру Канада және Австралия деңгейінде
АСТАНА. ҚазАқпарат - Қазақстандағы өнеркәсіптік компанияларда цифрландыру деңгейін Канадамен және Австралиямен салыстыруға болады. Бұл туралы Астанада «Субконтракт биржасы 2018» екінші форумында «Қазақстандық индустрияны дамыту институты» АҚ басқарма төрағасы Марат Ыдырысов айтты, деп хабарлайды ҚазАқпарат.
Оның сөзіне қарағанда, Германиядан келген серіктестер көмегімен Қазақстан ірі отандық компанияларды төртінші өнеркәсіптік революцияға даярлап жатыр.
«Бұл жұмысты бастар алдында елімізде іске қосылған компанияларға шолу жасадық. Осы орайда олардың деңгейіне талдау жүргізілді. Біздегі компаниялардың даму деңгейі толық цифрландырудан айтарлықтай қалыс келе жатыр. Дегенмен де осындай жағдай басқа да елдерде байқалуда. Бұл бағытта ілгері келе жатқан Германияның өзінде компаниялардың тек 10 пайызы ғана Индустрия 4.0 деңгейіне сай келеді», - деді ол.
Халықаралық сарапшылардың талдауына сүйене отырып, Қазақстандағы өнеркәсіптік компанияларда цифрландыру деңгейін Канадамен және Австралиямен салыстыруға болады.
«Халықаралық сарапшылардың қорытындысына сүйенсек, Канада мен Австралия Индустрия 2.0 деңгейінде тұр. Бұл көрсеткіш Қазақстанмен шамалас. Қазіргі кезде Қазақстан компанияларына өзінің бәсекеге қабілеттілігін арттыруға мүмкіндік беретін шараларды пысықтаудамыз», -деп түйді М. Ыдырысов.
Ұқсас жаңалықтар
