Малайзиялық Boeing жолаушылар ұшағы Донецк облысы аумағына құлады, 280 жолаушы мен 15 экипаж мүшесі қаза тапты.

Әскери-саяси зерттеулер орталығының басшысы Дмитрий Тымчук Киев уақытымен сағат 16.20-да Киев пен Ростовтағы жердегі қызметтер Куала-Лумпур – Амстердам рейсін жасаған әуе лайнерімен байланысты жоғалтып алғанын хабарлады. Украина Президенті Петр Порошенко Донецк облысында «Малайзия әуе желілері» компаниясының апатқа ұшырауын террористік акт деп көрсетсе, өзін тәуелсіз ел деп жариялаған Донецк ұлттық республикасының басшылары апатқа ұшыраған Boeing 777 ұшағын атып құлатпағандарын мәлімдеді. «Бізде ондай биіктікте ұшып бара жатқан ұшақты атып құлататын зымыран кешені жоқ. Қолда бар қаруымызбен тек 3-4 шақырым биіктіктегі нысанды атып құлата аламыз», – деді ДҰР билігінің өкілі Сергей Кавтарадзе Интерфакске берген сұхбатында.