Мектептен үйге келген Нұрайым Асылжан іші ауырып тұрғанын айтып, кешке қарай дене қызуы көтерілгеннен кейін жедел жәрдем қызметін шақырады. Оқушы қызды облыстық балалар ауруханасына апарады.

«Бәрі 14 қыркүйекте басталды. Облыстық ауруханадан жұқпалы аурулар бөліміне апарып, ол жер қабылдамай қойғаннан кейін емханаға жіберді. Ол жерде де айтарлықтай көмектескен жоқ. Содан қайтадан жедел жәрдем шақыруымызға тура келді. Баланың соқырішек болуы мүмкін екенін айтты, бірақ олай болмай шықты. Одан кейін қайтадан жұқпалы аурулар бөліміне барды, бірақ тағы да нәтижесіз болды», - дейді оқушының әкесі Жандос Айтуов.

Төртінші күні оқушы қыздың іш қуысын тексеру үшін лазерлік зерттеуге жібереді. Оқушының жақындары айтуы бойынша, бұл үшін дәрігерлер науқасқа наркоз еккен. Одан кейін бала комаға түсіп қалады. Ол осы күнге дейін қозғала алмайды. Оған мүгедектік рәсімдеп берген. Қыздың туысқандары дәрігерлер алдымен сынама жасап, баланың наркозға аллергиясы бар-жоғын біліп алулары керек болатынын айтады. Дәрігерлердің айтуынша, оқушы қыз ауруханаға 37,6 температурамен түскен. Наркозға қарсы көрсетілім болған жоқ.

«Лапароскопия жолымен іш қуысында хирургиялық ауру жоқ екені анықталды. Наркоз кезеңі бірқалыпты өтті. Наркоздан кейін 15 минут өткен соң жасанды тыныс алдыру барысында оның жүрегінің жұмыс қызметі тоқтап қалды», - дейді облыстық балалар ауруханасы бас дәрігерінің орынбасары Азат Сатжанов.

Бала арада алты минут өткенде ғана өмірге қайтып оралды, бірақ оның ми қызметі тоқтап, комаға түсіп қалды. Ол 20 күн бойы осындай жағдайда жатты.

«Балада спастикалық тетрапарез. Осыған байланысты ол қалыпқа келу үшін ұзақ уақыт емделуі керек. Науқастың жағдайы бойынша жымбыл облыстық балалар ауруханасының әкімшілігінде қызметтік тексеріс жүріп жатыр», - дейді Сатжанов.

Дәрігерлер әзірге баланың толыққанды жазылып кететіні туралы болжам жасай алмайды. Оқушының ата-анасы шетел емханаларына да хабарласып көрген. Оларға израильдік дәрігерлер көмектесе алатынын айтқан, бірақ емделу құны 60 мың доллар тұрады. Баланың емделуіне облыстық денсаулық сақтау басқармасы да көмектесуге дайын. Олар оқушы қызды квота алу кезегіне қоюға уәде берген.  

Дереккөз:baq.kz