Жапондық автомобиль концерні жолда қалқып ұшып жүретін автомобиль жасаумен айналысуда. Бұл туралы Сан-Францискода Bloomberg's Next Big Thing Summit конференциясы барысында компанияның техникалық топ басшысы Хиройоши Йошики мәлім етті, деп хабарлады  РБК, Bloomberg-ке сілтеме жасай отырып.

Хиройоши Йошикидің айтуынша, жасалып жатқан көлік кәдімгідей ұшпайды, тек жолда үйкелісті азайту, көлік тиімділігін арттыру үшін сәл көтеріліп, қалқып жүреді. Хиройоши Йошики ұшатын көлікпен жұмыс Toyota компаниясының ең озық жасалымдарының бірі болатынын айтып өтті. Ол  жобаны қашан қолға алғаны, қанша уақытқа созылады, сериялық үлгілері қашан шығады деген сұрақтарға  егжей-тегжейлі жауап беруден бас тартты. Бұдан бұрын Toyotaның  сутегімен жұмыс істейтін отын элементтерімен жүретін  көлікті сатуды жыл аяғында  бастайтыны  белгілі болған еді. Жапондық Japan Times газеті атап өткендей, оның құны 78 мың доллар болмақ, алайда келесі онжылдықтың басында баға 30 мың және 50 мың долларға дейін түсуі мүмкін.

Ақпарат көзі: www.kazinform.kz