Еуразиялық экономикалық одақ туралы келісімшарт Ресей және Беларусь парламенттерімен бірлесіп жүргізіледі. Ал қыркүйек айында оны бекіту жоспарланып отыр. ҚР Парламенті Мәжілісінің депутаты Мәулен Әшімбаевтың мәлімдеуінше, одақ аясындағы қарым-қатынастарды дамыта отырып, Қазақстан өзiнiң ең басты стратегиялық мақсаттарына қол жеткiзедi. Сондай-ақ, депутат Еуразиялық интеграцияның үш басты қағидасын атап өтті. Мәулен Әшімбаев, ҚР Парламенті Мәжілісінің депутаты: - Еуразиялық интеграция Қазақстан тәуелсіздігін сақтап, оның егемендігі мен аумақтық тұтастығын қамтамасыз еткен жағдайда ғана дамиды. Бұл – интеграцияның басты қағидасы. Екінші маңызды қағида – экономикалық прагматизм. Елдер нақты экономикалық мүддеге сай ықпалдасады. Бұл ешқандай да астарлы саяси мүдде емес, тек қана экономикалық қарым-қатынас. Соңғы қағида – мемлекеттер арасындағы теңдік және тең құқылық.

Ақпарат көзі: www.baq.kz