«Жаңа Қазақ ұлттық хореография академиясы құрылысының аяқталуымен құттықтаймын. Елордамызда тағы да бiр керемет ғимарат бой көтерді, оның бiздiң астанамызда ғана емес, бүкiл Орталық Азияда теңдесi жоқ. Бұл – Тәуелсiздiктiң 25 жылдығына арналған елордамызға, Қазақстанға үлкен тарту. Бiлiм ордасы елорданың сәулетiмен бiрге қысқа уақытта салынған. Хореография академиясы отандық би өнерiнiң қара шаңырағы болатынына сенемiн», - дедi Мемлекет басшысы.

Елбасының айтуынша, академияның ректоры болып танымал балет әртiсi Алтынай Асылмұратова тағайындалды. Мемлекет басшысы академияға сый ретiнде асыл тастармен көмкерiлген балет бишiсiнiң мүсiнiн сыйға тартты. Атап өтсек, Академия балет өнерінің түрлі саласында білім беруді жүзеге асырады және кішкентай кезден кәсіби балет орындаушыларын тегiн дайындайтын болады. Хореография академиясында балет әртістері негізгі жалпы немесе орта жалпы білім базасында кәсіби білім алады. Білім берудің көпсатылы формасы – Бастапқы білім, Техникалық және кәсіби білім, Жоғары білім (бакалавриат), ЖОО-дан кейінгі білім (магистратура), сонымен қатар ЖОО-дан кейінгі білімнен (докторантура PhD) тұрады. Академия «Балет әртісі», «Би ансамблінің әртісі», «Режиссер хореограф», «Хореограф педагог», «Спорттық балдық би педагогы», «Өнертану» және «Арт-менеджмент» мамандықтары бойынша кадрлар даярлайтын болады. Аталған оқу ордасының шәкірттері тұратын орны мен медициналық қызметке төлемейді. 2016 жылдың мамырында Академияға студенттер қабылдана бастаған болатын.

Ақпарат көзі: Baq.kz