Білім
Әлеуметтік желілерде жастардың сауатты болу жайы түсіндірілді
- author «Ақ жол»
- 18 шілде, 2016
- 249
Әлеуметтік желілерде жастардың сауатты болу жайы түсіндірілді
Бүгінде әлеуметтік желілердегі белсенділік тым жоғары екенін ескерсек, сол желілердегі жазбалардың деңгейі қандай? Жалпы, әлеуметтік желілерді оң мақсатта қолданудың қыр-сырын «Хабар» агенттігінің Арнайы жобалар қызметінің жетекшісі, белгілі блогер Өркен Кенжебек және блогер Яков Федоров Жамбыл политехникалық колледжінде жамбылдық жастармен өткізген семинарда айтып берді.
«ZhastarUP» жастарды оқыту жобасы аясында өткізілген семинардың ашылуында Өркен Кенжебек: «Интернеттің кең таралуынан да болса керек, қазіргі жастар кітап оқымайды. Олардың алатын негізгі ақпарат көзі – интернет. Белгілі ақын Бекболат Тілеуханның «интернет деген – күн сияқты. Күнді алақаныңмен жаба алмайсың. Сондықтан ғаламтор желісінен елге кері әсер ететін келеңсіз дүниелер көп екен деп, іргеңді аулақ салмай, қайта сауатты ақпараты мол, түйсікті жастар көбею үшін интернеттің оң әсерін қолдануымыз қажет. Жағымды, жақсы пост жазсақ, жақсылықтың қатары көбейеді. Жастарымызды осы мақсатқа талпындыруымыз тиіс. Мысалы, мен журналистен гөрі, блогер болумен көп танылдым. Шет елдерге шығып, танымал тұлғалармен кездесіп, санамдағы серпілістер – осы блогерлік тәжірибемнің арқасы. Интернет бүкіл адам баласына теңдей берілген үлкен мүмкіндік. Біреу оны жақсылыққа, енді біреуі жамандыққа пайдаланады. Ал біз жақсылыққа қолдануымыз керек. Елді бірлікке, ынтымаққа шақыру, ой-танымды кеңейту секілді көптеген тиімділігі зор. Осы орайда, көпшілігіміздің кемшілігіміз, бір істі біреуге жүктей салу. Біреуі болмаса, біреуі жазар деп екінші адамға сілтейді. Сосын мен жазсам, «сіз менің ойымнан дөп шықтыңыз. Мұны мен де ойлағанмын» деп коммент жазады». Ал неге сол ойыңызды өзіңіз бөліспейсіз, жазбайсыз. Басқа біреу айтады деп жүргенде, ол адам айтпай қалса, ойыңыз өзіңізде қалады және басқаларға тарамай қалады. Жаңа көзқарастағы жастардың жаңа жазбалары, жаңа әлемін қалыптастыруымыз керек» деп жастарға әлеуметтік желілерде белсенді болуға шақырды.
Әлеуметтік желі белсенділерінің қатысуымен қазақ интернет кеңістігін сапалы мәтінмен, бейне, фото контентпен толықтыру, шын мәнінде еліміздің имиджін көтеріп, келешегін кемелдендіруге ықпал ететіні сөзсіз. Ол үшін әлеуметтік желілер мен блог-тұғырнамаларда жеке парақшалар ашудың маңыздылығы, жағымды әрі сауатты пост жазу, және пост жазуда оның конструкциясын құра білу, ал, ол үшін ғылыми-техникалық журналдарды көптеп оқу керектігі, белгілі бір мақаламен немесе фото, бейнемен болсын адамдарға ой салу, ақпаратты жариялағанда, оның шынайылығына көз жеткізу, позитивті және негативті тәжірибемен бөлісу — міне, мұның барлығы семинар барысында тәптіштеп түсіндірілді. Сондай-ақ, әлеуметтік желілер өз шығармашылығын халыққа танытып немесе жеке бизнесін дамытып, тіпті, жақсы жұмыс орындарын тауып, жұмысқа орналасуға да мол мүмкіндік екені айтылды.
- Қазіргі қоғамда интернет қолданушылардың белсенділігі жоғары. Алайда, жастардың көбісі «В контакте», «Инстаграмм» желілерін ғана қолданады. Онда өзіне қажетті мәліметті алумен ғана шектеледі. Ал, елімізде, шетелде болып жатқан түрлі саяси маңызды мәселелер мен оқиғалардан бейхабар. Мұндай мемлекеттік маңызды оқиғалар «Faceebok», «Twitter» желілерінде көптеп айтылады. Және мұнда танымал тұлғалардың пікірлері жазылады. Осындай жазбаларды оқу арқылы ой-санамыз дамып, өзіміз де пікір айтуға үйренеміз. Енді аталған желілерде тіркеліп, жеке парақшамды ашамын. Бүгінгі дәрістен осындай ой түйдім, - деді семинарға қатысушы Ләззат Әділханқызы .
Шынтуайтында, басқа қалаларға қарағанда, әлеуметтік желілерде жамбылдық жастардың белсенділігі төмен екен. Қатарын көбейту үшін, мұндай семинарды алдағы уақытта да өткізу керек-ақ.
Шынар Асанқызы.
Ұқсас жаңалықтар
Саналы ұрпақ сап түзеген салтанат
- 3 қыркүйек, 2024
Жаңа жетістіктерге жол бастаған күн
- 3 қыркүйек, 2024
Ақпарат
Алматылық қос азаматтың жазасы жеңілдетілді
- 30 тамыз, 2024
Президент эстрада әншісін «Барыс» орденімен марапаттады
- 22 шілде, 2024
Газетке жазылу
«Aulieata-Media» серіктестігі газетке онлайн жазылу тетігін алғаш «Halyk bank» қосымшасына енгізді