Сарыкемер орта мектебінде «Жыл оқушысы-2015» оқушылар байқауы ұйымдастырылып, оған аталмыш ауданнан 17 үміткер қатысты. Білім бәсекесінің өтуіне «Өрлеу» біліктілікті арттыру ұлттық орталығы және Байзақ ауданы әкімдігінің білім бөлімі, сондай-ақ Сарыкемер орта мектебі ұйытқы болды. Екі айға жуық созылған байқауда қатысушылар 4 кезең бойынша өз мықтылықтарын мойындатуға күш жұмсады. Сонымен қатар, жарыстың ережесіне сай жас ерекшеліктеріне қарай (І топ – 6-7 сынып, ІІ топ – 8-10 сынып) топтастырылған болатын. Байқау қорытындысы бойынша «Жыл оқушысы» болып Сарыкемер орта мектебінің 10-сынып оқушысы Әсем Пірімқұлова танылды. Аталмыш білім ордасының 6-сынып оқушысы Мади Жанұзақ пен Жамбыл орта мектебінің 8-сынып оқушысы Нарбек Есимов жүлделі орындардан көрінсе, ІІ орын 9-сынып оқушысы Нұризат Мұсанова (Абай орта мектебі) мен 7-сынып оқушысы Карина Янға (Ғ.Мұратбаев мектеп-гимназиясы) бұйырды. Үздік үштікті Түймекент орта мектебінің оқушысы Бекасыл Балпанқұл (7-сынып) және Абай орта мектебінің оқушысы Аружан Тұрсынханова (9-сынып) түйіндеді.

Мұхит НӘМЕТҚҰЛОВ. Сарыкемер орта мектебінің директоры. Байзақ ауданы.