Алпысбай Боранбайұлы         Пойызға мінсеңіз, Кітап сатып жүр бір семіз. Бұл семіздің аты-жөні Сықақшы ақын Боранбайұлы Алпысбай болады, Білсеңіз. Өзіміз семіз болғанмен Кітабымыз қылдай арық, Жұқа болмай қайтсын-ай, Жүрмегесін пұлға жарып. Иә, нарықтың аты нарық. Бір біз емес, бәріміз де, Болдық-ау біраз ғаріп. Кітап шығаруға да ақша керек, Қағаз керек, басқа керек, Бәрінен бұрын «Демеуші» дейтін «қасқа» керек. «Демеуші құрғыр жоқ қой» – деп Құдайдың қайдағы зарын айтпай, Үйдегі барын айтсақ: Құдайға шүкір, 1. Бір әйел, Алты баламыз бар. 2. Малдан: бір сиыр, Екі ұрғашы танамыз бар. 3. Жылымыз (1950) – барыс Есімдері елге таныс Көпен Әмір Бек, Әселхан Қалыбекова Екеуі де құрдас, әрі сырлас, Демеңіздер бізден жау келеді. Жалпы барыс жылғылар, Әселхан сияқты дәу келеді. 4. Мамандығымыз – инженер 5. Шығарған он-шақты кітабымыз бар Ішінде әзіл-сықағымыз бар. «Күліп жүрсін, Оқып ап, біліп жүрсін», – Деп шындықты қазып келеміз. Айтпақшы, кітап алсаңыз Стол емес, қарнымызға қойып, Қолтаңба жазып береміз.