Түркияның «Өнже ватан» газеті мен «Тарих» журналының кезекті санында Алматы облысының Есік қорғанында табылған мәдени мұрамыз - «Алтын адам» жайлы көлемді мақала жарық көрді. Күндік таралымы 30 мыңнан асатын беделді басылым оқырман қауымына Есік обасынан шыққан ежелгі сақ дәуірінің 4 мыңға жуық асыл бұйымдары мен өзге де құнды жәдігерлері туралы танымды ақпаратымен бөліскен. Мақала авторы Кемал Саллы қорғанда қазба жұмыстарын жүргізген академик Кемел Ақышев бастаған қазақ археологтарының ғылымға қосқан еңбегіне де кеңінен тоқталып, олардың бұл табысын «адамзат тарихы мен түбі бір түркі жұртының теңдессіз олжасы» деп бағалады. Сондай-ақ, мақалада күміс тостағанның түбіне салынған көне руна әліпбиі де назардан тыс қалмаған. «Өйткені руна жазбасы түркі халықтарының адамзат өркениетіндегі орнын баршаға айқындап берді», - дейді Кемал Саллы.