Атап өтейік, сол кезеңде құрылыс жұмысына жауапты мердігермен 2 миллиард теңгеге жуық қаражатқа келісімшарт жасалған. Ең өкініштісі, ғимараттың іргетасын салу кезінде қолданыст ағы мемлекеттік стандарттың бұзу деректері анықталған. Нәтижесінде, арнайы комиссия шешімінің негізінде нысанды қайта бұзуға тура келген.

Бұдан бөлек алматылық «SHEBER BUILD» жауапкершілігі шектеулі серіктестігіне орын алған олқылықтар атап көрсетіліп, тиісті хаттама толтырылған. Сондай-ақ облыстық ауданаралық экономикалық сотына негізгі жобадан ауытқығаны үшін мердігер компаниямен арадағы келісімшартты бір жақты бұзу және алдын ала аударылған (аванс) қаражатты қайтару бойынша талапарыз жолданады.

– Негізінен, бұл аумақта үш бірдей бес қабатты тұрғын үй салынуы керек. Ал №1 тұрғын үйдің жалпы құны – 1 миллиард 857 миллион теңге. 2024 жылы 400 миллион теңге қаражат бөлінген. «SHEBER BUILD» мердігер компаниясымен сол жылдың мамыр айында келісімшартқа отырып, 100 миллион теңге көлемінде алдын ала қаржы аударып бердік. Алайда серіктестік өкілдері бұл қаржыны толық игере алмады. Сөйтіп, осы жылдың қазан айында облыстық мемлекеттік сәулет-құрылыс бақылау басқармасы нысанды тексеру барысында бірқатар олқылықтарды анықтады. Атап айтқанда, нысанның іргетасы 11 жерден жарылды. Осылайша ғимаратты қайта бұзуға шешім қабылданды. Мұнан соң біз мердігер компанияны сотқа бердік. Ал сот отырысы үш айға созылды. Шын мәнінде, серіктестік сегіз жарым айдың ішінде құрылыс жұмыстарын аяқтауы тиіс болатын. Яғни нысан өткен жылдың ақпан айында пайдалануға берілуі керек еді. Өкінішке қарай, мердігер компания құрылысты белгіленген уақытта бітіре алмады. Бүгінгі таңда көршілес Алматы облысының сот орындаушылары қаражатты мәжбүрлеп қайтаруға күш салып жатыр, – дейді аудан әкімдігінің сәулет, қала құрылысы және құрылыс бөлімінің басшысы Серік Оңланбеков.

Айтпақшы, бүгінгі таңда ғимараттың қосалқы мердігері нысан аумағында өз қаражаты есебінен 68 миллионға жұмыс жүргізіп үлгерген. Бұл жұмыстарды аудан әкімдігінің сәулет, қала құрылысы және құрылыс бөлімі қабылдап та алыпты. Ал осы аумақтағы екі бірдей көпқабатты тұрғын үйдің құрылысын бастау үшін облыс тарапынан рұқсат берілмепті.

«Құрылыс жұмыстары облыстық бюджеттен қаржыландырылады. Мәселен, бес қабатты екі тұрғын үйдің әрқайсысының құны – 1 миллиард 600 миллион теңге. Сол себепті облыс тарапынан рұқсат жоқ. Ең әуелі алғашқы нысан толық аяқталуы тиіс. Қазіргі таңда №1 тұрғын үй бойынша мемлекеттік сатып алу конкурсын қайта жарияладық. 2024 жылы конкурсқа үш фирма қатысқан. Ал 15 сәуірде конкурстың нәтижесі белгілі болады», – дейді Серік Оразұлы.

Сонымен шулық шенеуніктердің сөзінше, тұрғын үйлерге қатысты құрылыс жұмысының қожырауы мердігер ұйымның үйлесімді жұмыс істемеуінен көрінеді. Оның үстіне әлі конкурстың нәтижесі де шықпаған. Алайда ендігі жерде мердігерге жауапкершілік күшейтіліп, қазынаның әр тиыны тиімді жұмсалуын қатаң қадағалаған жөн. Әйтпесе, бұрынғы жайбасарлықтан арыла алмаспыз. Бір ғана мысал, №1 тұрғын үйдің құрылысы тыңғылықты аяқталғанда аз қамтылған қаншама отбасы баспаналы болып, қоныс тойын тойлаған болар еді. Әзірге аудан бойынша тұрғын үй кезегінде тұрған 15 мыңға жуық азаматтың сабыр сақтаудан басқа амалы жоқ секілді...

Есен ӨТЕУЛІ

Шу ауданы