Тараз қаласындағы «Асар» оңалту орталығы базасында «Тамаша үй» жобасы аясында оқыту семинары өтті. Баспанасыздықпен күрес бойынша шешімдерді қолдау бағдарламасы шеңберінде өткен іс-шараны «Жастар мүгедектер қоғамы» қоғамдық бірлестігі ұйымдастырды. Бұл семинар мүгедектігі бар әйелдер мен балалардың ата-аналарын қолдауға бағытталған үш кезеңді бағдарламаның бір бөлігі. Оқыту әр лекке 20 қатысушыдан құралған топтармен өткізілді, бұл атаулы және тәжірибеге бағытталған тәсілді қамтамасыз етеді.
– Бағдарламаның бірінші легі өткен жылдың қыркүйек айында өтіп, 20 бенефициарды біріктірді. Қатысушылар қаржылық және құқықтық сауаттылық, жұмыспен қамту, кәсіпкерлік және әлеуметтік бейімделу бағыттары бойынша практикалық білім мен дағдылар алды. Бағдарламаның үшінші легі дәл осы бағыттар бойынша оқыту семинар-тренинг форматында сәуір айына жоспарланған. Ал ақпанда өткізілген семинардың мақсаты – қаржылық, құқықтық және әлеуметтік сауаттылықты арттыру, жұмыспен қамтылу және өзін-өзі жүзеге асыру мүмкіндіктерін кеңейту, сондай-ақ көшбасшылық дағдыларды дамыту. Іс-шара барысында қатысушылар басқару құралдарымен, жеке қаржыны тиімді жүргізу және жинақ қалыптастыру тәсілдерімен, құқықтық сауаттылық негіздерімен, жұмыспен қамтылу және жеке ісін ашу мүмкіндіктерімен, сондай ақ бизнес-жоспар әзірлеу және гранттық қолдау алу жолдарымен танысты. Жеке блоктар көшбасшылық құзыреттерді дамытуға, өзіне деген сенімділікті арттыруға және әйелдердің қоғамдық әрі экономикалық өмірге белсенді қатысуына арналды. Бұл жобада инклюзивтілік және әлеуметтік кедергілерді еңсеру мәселелеріне ерекше назар аударылады, – дейді жоба үйлестірушісі Севара Нұрматова.
«Тамаша үй» жобасы халықтың осал топтарының арасында әлеуметтік шеттетілу мен баспанасыздықтың алдын алуға, сондай-ақ тұрақты өмірлік және кәсіби дағдыларды қалыптастыруға бағытталған. Осы жобаның көмегімен тиісті бағдарламаларға қатысып, баспаналы болғандар да бар. Жоба нәтижесін көретіндердің қатары алдағы уақытта арта түсеріне сенеміз.
Қамар ҚАРАСАЕВА
Ұқсас жаңалықтар
