Дәл осындай жағдайға айналдырған 5 айдың ішінде 2 рет өзім де тап болдым. Тамыз айында пайдаланған су үшін төлем түбіртегі 10 мыңнан аса теңгені көрсетіп келгенде, таңқалғанымды жасыра алмаймын. Анығын білу үшін мекемеге барсам, абонент бөліміндегі әрбір қызметкердің алдында кезек күткендердің қарасы қалың. Қазір халыққа қызмет көрсететін мекемелерде кезек тәртібі сақталу үшін электронды кезекке қою жүйесі қолданылады. Ал «Жамбыл суда» ол да жоқ. Яғни, мұнда жасанды интеллект түгілі цифрландырудың қарапайым түрлері де байқалмайды. Жұмысым бір күнде шешілмей, үш күн қатарынан «Жамбыл судың» табалдырығын тоздыруыма тура келді. Мекеме қызметкерлері кеткен қателікті су есептегіш құралдың көрсеткіші базаға 3 ай бойы тіркелмегенімен түсіндірді. Тұрғын ретінде бақылаушыға ай сайын су есептегіш құралдың көрсеткішін уақтылы беріп отырғанымды дәлелдеп барып, төлейтін сома азайтылды. Үш күн сандалсам да мәселемнің шешілгеніне қуанғанмын. Алайда, дәл осы жағдай 4 айдан соң тағы қайталанды. Бұл жолы да бақылаушының салғырттығынан су есептегіш құралымның көрсеткіші базаға енгізілмей, әдеттегіден үш есе артық төлем түбіртегі келді. Өзге де қала тұрғындарынан сұрастырсам, мұндай жағдайға кездескен тараздықтар көп екен, тіпті бақылаушылардың жиі ауысатындығынан бір айда екі рет төлем жасағандар да бар. Бір-екі рет қателессе түсінуге болар, бірақ үнемі бақылаушылардың салғырттығының зардабын тұрғындар неге тартуы керек? Анық-қанығын білу үшін аталған мекемеге бардық.

Мекеме директорының орынбасары Гаухар Даулетқұлова да тұрғындар тарапынан түсетін шағымдардың көптігін жасырмады.

– Рас, ондай шағымдар көп. Жалақының аздығынан бақылаушы тұрақтамайды. Бұл қызметке кәсіби білімі барлар келмейді. Көбіне мектеп бітірген жастарды аламыз. Сөйтіп оларға жұмысты өзіміз үйретеміз, бірақ бір қателігі үшін жазаламақ түгілі ескертіп ұрысқанның өзіне олар ренжіп, жұмыстан шығып кете салады. Бақылаушының аздығынан әрқайсысының учаскесіне 3 мың абоненттен берілетін жағдай да болады. Қазір қала шетіндегі су жүргізілген бірнеше ауылдар да біздің мекемеге қосылып жатыр. Яғни, «Жамбыл су» мекемесінің қызмет көрсететін абоненттерінің қатары артып отыр, – деді Гаухар Мырзабекқызы.

Қазір барлық іс цифрландырылып жатыр. Бұл еңбек нарығындағы адам күшін қажет етуді азайтумен қатар, адами фактордан орын алатын қателіктердің болмауына да көмегі көп. Егер коммуналдық қызметтер цифрлық жүйеге көшсе, бақылаушының салғырттығының салдарынан тұрғындар жапа шекпес еді. Алайда, мекеме директорының орынбасары оған қол жеткізуге біраз кедергі барын алға тартты.

– Цифрландыру үшін қойылатын есептегіш құралдың өзі 10 мың теңге тұрса, модемі 30-40 мың теңге шамасында. Халық ондай құралдарды түгел қоймайды, қазір «класс с» деген модемсіз түрін қойдыртып жатырмыз, оның өзі де ашса, сынады. Осылай цифрландыруға мүмкіндігінше алғашқы қадамды жасап жатырмыз, – деді Гаухар Даулетқұлова.

Бірақ, «Қазақгаз» компаниясы қазір арнайы қосымшасы арқылы есептегіш құралдың көрсеткішін тұтынушы өзі жолдай алатын жүйені қолданып отыр. Оған бағасы қымбат есептегіш құрал да, ешқандай модем де сатып алғызып жатқан жоқ. Бар болғаны QazaqGaz Aimaq қосымшасын ұялы телефонға жүктеп, әр айдың 20-25-і аралығында есептегіш құралдың көрсеткішін сканерлеп, жолдау жеткілікті. Осындай қолданысқа енген тиімді мүмкіндікті айтқанымызға мекеме директорының орынбасары «Жамбыл су» мекемесі тұрғындар үшін ортақ WhatsApp желісіндегі номерлерін іске қосқандарын айтты.

– Абоненттердің әр учаскесіне ортақ WhatsApp номерін қолданғанымызға екі жылдан асты. Атап айтсам, 1-учаске 8 700 500 1541, 2-учаске 8 700 500 1542, 3-учаске 8 700 500 1546, 4-учаске 8 700 500 1497, 5-учаске 8 700 500 1475 номерлеріне WhatsApp желісінен әр айдың 20-сынан 25-сіне дейін есептегіш құралының көрсеткішін суретке түсіріп жіберуге болады. Сонда ешқандай бақылаушысыз-ақ бірден біздің мекеменің базасына келеді де тиісті төлем есептеліп, әркімнің өзі қолданатын банктің қосымшасынан төленетін сома шығып тұрады. Ал қазір осы іс үшін арнайы телеграм-бот жасалып жатыр, алдағы уақытта соны іске қосамыз. Біздің мекемеміз сүзу алаңдарына ағынды кәріз суларын қабылдау және бұру қызметін де көрсететіндіктен, әлгінде айтқан номерлерге WhatsApp желісі арқылы мұздай судікімен қоса ыстық судың да есептегіш құралының көрсеткішін жолдауы тиіс. Жалпы төленетін сомаға пайдаланылған ыстық судың көлемі де есептеледі. Себебі, тұрғындар пайдаланған ыстық су «Жамбыл су» мекемесі қызмет көрсететін кәріз жүйесі арқылы ағады, – дейді «Жамбыл су» мемлекеттік коммуналдық кәсіпорыны директорының орынбасары Гаухар Даулетқұлова.

Яғни, бақылаушыға сенім артпай, тұтынған суымыздың көлемін мекеменің WhatsApp желісіндегі номеріне өзіміз жіберіп, тіпті төлейтін соманы да өзіміз есептеп отыратын болдық. Әйтпесе, жауапсыз бақылаушылардың кесірінен босқа шығындануымыз бек мүмкін.

Қамар ҚАРАСАЕВА