Осындай ақ халатты абзал жандардың бірі – жас медбике Шұғыла Орынбай. Ол бүгінде облыстық перинаталдық орталығының неонатология бөлімінде, нақтырақ айтқанда, ре анимация бөлімінде қызмет атқарады. Әрдайым адам жанының арашашысы болуды мақс ат тұтқан жас маман өз ісіне асқан жауапкершілікпен қарайды. Әрине, медбике мамандығы бір қарағанға қатардағы кәсіптердің бірі болып көрінуі мүмкін. Тіпті, кей кісілер бұл саладан ауыртпалығы мен жауапкершілігі үшін қашатыны да жасырын емес. Алайда, Шұғыла Жандосқызы бұл жолды жүрек қалауымен таңдаған жан. Ол үшін медицина – жай ғана жұмыс емес, өмірлік ұстаным.

Бұқаралық ақпарат құралдарында әр саланың майталман мамандарын таныстырылып жатады. Ал тасада жүріп, періштелер мекенінде тынымсыз еңбек етіп жүрген жандардың еңбегі көп жағдайда елеусіз қалатыны бар. Бүгінгі мақаламызда дәл осындай мамандардың бірі – неонатология бөлімінің жас медбикесі Шұғыла Орынбайды оқырманға таныстыруды жөн көрдік. Себебі, қоғам осындай еңбек адамдарының қызметін біліп, бағалауы тиіс. Шұғыла Орынбай 2004 жылдың 19 қыркүйегінде Байзақ ауданына қарасты Мәдімар ауылында дүниеге келген. Ол Шоқан Уәлиханов атындағы орта мектепте білім ала жүріп-ақ, болашақ мамандығын анықт ап, медицина саласын таңдаған. Жас маманның тәрбиесі мен таңдаған жолында атаанасының қолдауы ерекше. Адал еңбек пен адамгершілік құндылықтарды бойына сіңірген ата-анасының сенімі – оның басты мотивациясы.

– Медицина саласына бала кезімнен қызықтым. Қуыршақтарымды «емдеп», ойыншықтарымды медициналық құрал ретінде пайдаланатынмын. Бұл – сол кездің өзінде болашағыма жасалған алғашқы қадамдарым деп ойлаймын. Өсе келе медбике болғым келетінін ата-анама айттым. Олар бұл т аңдауымды қолдап, сапалы білім алуыма бар жағдайды жасады. Енді сол сенімді ақтау – менің басты мақсатым, – дейді Шұғыла Жандосқызы.

Арманы мен мақсатын ұштастыра білген ол 2023 жылы Жамбыл жоғары медициналық колледжін «Медбике ісі» мамандығы бойынша тәмамдап, небәрі 18 жасында еңбек жолын бастады. Жас болса да, үлкен жауапкершілікті мойнына алуға дайын екенін сол алғашқы күннен-ақ дәлелдей білді. Оқу орнын аяқтаған соң жас маман Тараз қаласындағы облыстық перинаталдық орталықтың неонатология бөлімінің реанимациясында қызметке кірісті. Көпшілік үшін үрейлі көрінетін бұл бөлім ол үшін сабыр мен төзімділіктің, кәсіби шыңдалудың нағыз мектебі болды. Себебі, мұнда әр секунд, әрбір қабылданған шешім жаңа туған нәрестенің өміріне тікелей әсер етеді.

Бұл бөлімде салмағы небәрі 500 грамм болатын шала туған сәбилер де ем қабылдайды. Кей жағдайларда олардың өмірі үшін күрес апталап, тіпті айлап жалғасады. Осындай сын сәттерде нәрестенің аман-есен реанимациядан шығып, ата-анасының қолына табысталуы – медицина қызметкерлері үшін ең үлкен жеңіс. Осындай өмір мен өлім арпалысқан ортада қаршадай қазақ қызының еңбек етуі нағыз ерлік деуге тұрарлық. Жас медбикенің кәсіби қалыптасу жолында тәжірибелі әріптестерінің қолдауы ерекше. Шұғыла Жандосқызы бізбен сұхбаттасу барысында облыстық перинаталдық орталығы бас дәрігердің орынбасары Талғат Толықбаевқа, бөлім меңгерушісі Лора Асановаға, сондай-ақ реанимация бөлімінің дәрігерлері Мұрат Рүстемов, Шавкат Худайбергенов және Гүлдана Пошакаеваға көрсеткен қамқорлығы мен үйреткен тәжірибесі үшін алғысын білдірді.

Қазіргі таңда періштелер мекенінде еңбек етіп жүрген жас медбикенің арманы асқақ, жоспары айқын. Ол болашақта дәрігерлік білім а лып, медицина саласында кәсіби деңгейін арттыруды мақсат етеді. Оның айтуынша, медицина – тағдыр мен жүректің таңдауы. Сөз соңында Шұғыла Жандосқызы медбике мамандығын таңдауға ниетті жастарға өз кеңесін де жеткізді.

– Қиындықтан қашпау керек. Дәл осындай бөлімдерде адам ретінде де, маман ретінде де өсесіздер. Реанимация адамды сындырмайды, керісінше шыңдайды. Ең бастысы – ниет пен шынайы жанашырлық қажет, – дейді ол.

Шынында да, медбике болу – тек ем-шара жасау емес, алдымен адам жанының арашашысы болу. Осындай жауапкершілігі мол жолды таңдаған жас маман Шұғыла Орынбайдың алдағы уақытта білікті дәрігер атанып, ел игілігіне қызмет ететініне сенім мол. Жас маманға өркені өсе берсін дейміз.

Қамар ҚАРАСАЕВА