Қазақ детективінің негізін қалаған көрнекті қаламгер Кемел Тоқаев атындағы дәстүрлі детектив шығармалар байқауы мәресіне жетті. Биыл сегізінші мәрте ұйымдастырылған әдеби дода қасиетті Тараз төрінде өтті. «Заң медиа» корпорациясы 2018 жылдан бері тұрақты түрде өткізіп келе жатқан бұл байқаудың бастауы сонау 1994 жылы жарық көрген «Заң» газетінің алғашқы санынан бастау алады. Басылым сол кезденақ шытырман жанрға айрықша мән беріп, «Үкім», «Тергеуші жазбалары», «Сот іс қарады», «Бір қылмыстың тарихы» сияқты айдарлар арқылы оқырманға қызықты хикаяттар ұсынып келген.
Сол дәстүрдің жалғасы ретінде ұйымдастырылған биылғы байқауға үш ай ішінде еліміздің түкпір-түкпірінен 72 шығарма келіп түскен. Бұл детектив жанрына қызығушылықтың жоғары екенін және қазақ оқырманының шытырман оқиғалы туындыларға деген сұранысы артқанын көрсетеді.
Байқаудың басты мақсаты – жастардың кітап оқуға деген қызығушылығын арттыру, кенже қалған жанрды жандандыру және әдебиет арқылы әділдік пен заңның салтанатын дәріптеу. Достық үйінде өткен шараның мәні де ерекше. Себебі облыс әкімі Ербол Қарашөкеевтің бастамасымен биыл өңірде «Әулиеата – кітап оқитын өңір» атты жоба қолға алынған болатын.
Іс-шараға еліміздің ә р өңірінен зиялы қауым өкілдері мен қаламгерлер қатысты. Олардың қатарында адвокат Бауыржан Ахметов, ардагер, полиция полковнигі Әмірбек Шаймағамбетов, жазушыжурналист Нұрлыбек Саматұлы, «Хабар» агенттігінің басқарушы директоры Серік Әбікенұлы, медиаменеджер Ғалымжан Елшібай және басқа да танымал тұлғалар бар.
Жиынды «Заң медиа» корпорациясының директоры, белгілі журналист Досымбек Өтеғалиев жүргізді. Ал қазылар алқасына Парламент Сенатының депутаты, танымал журналист Нұртөре Жүсіп төрағалық етті. Сондай-ақ Серік Әбікенұлы, жазушы Көсемәлі Сәттібайұлы және журналист Оралхан Дәуіт туындыларды сараптап, үздіктерді анықтады. Облыс әкімінің орынбасары Серік Сәлемов өз сөзінде Кемел Тоқаевтың қазақ әдебиетіндегі орны мен тағылымдық мұрасына кеңінен тоқталды.
– Кемел Тоқаев қазақ әдебиетінде жаңа бағыттың іргетасын қалап, детектив жанрының дамуына өлшеусіз үлес қосты. Оның шығармалары жас ұрпаққа әділдік, еңбекқорлық пен отансүйгіштік қасиеттерді дарытады. Байқау жыл сайын кеңейіп, жаңа есімдерді танытуда. Бұл үрдіс жалғасын таба беретініне сенімдімін, – деді Серік Жақсылықұлы.
Байқау қорытындысы бойынша бас жүлдені «Мылқау түн» шығармасымен Гүлден Жылгелдиева (Алматы облысы) жеңіп алды. Бірінші орын «Қиыс жол» туындысының авторы Айзада Кенжемолдаеваға (Алматы қаласы) бұйырды. Сондай-ақ екінші және үшінші орын иегерлері арнайы сертификаттар мен сыйақыларға ие болды. Жамбыл облыстық соты биыл да дәстүрді жалғастырып, үздік шығармалар авторларына арнайы жүлделер табыстады.
Кеш соңында жеңімпаздарға гүл шоқтары ұсынылып, қатысушылар естелік суретке түсті.
Мақпал СҮЙІНБАЙ
Ұқсас жаңалықтар
