Егемен елімізде Құрлық әскерлерінің құрамында алғашқылардың бірі болып құрылған әскери округтердің бірі – «Оңтүстік» өңірлік қолбасшылығы. Алғашқы кезеңде Алматы, Жамбыл, Оңтүстік Қазақстан және Қызылорда облысының аумағында орналасқан қолбасшылыққа республиканың оңтүстік-шығыс шекараларының қауіпсіздігін қамтамасыз ету жүктелді. Ал округтің штаб-пәтері Тараз қаласында орналасты. Қайта құрылымдау кезеңдерінен өткен өңірлік қолбасшылықтың құрамына бұл күнде Жамбыл, Қызылорда мен Түркістан облыстары кіреді. Биыл мемлекетіміздің оңтүстік бөлігіндегі шекараларының қауіпсіздігіне жауапты әскериокругтің құрылғанына – 25 жыл. Жуырда облыс орталығында ширек ғасыр шыңдалған қолбасшылықтың мерейлі мерекесіне орай салтанатты іс-шара өтті.
Шараға Қазақстан Республикасы Қорғаныс министрінің бірінші орынбасары – Қарулы Күштердің Бас штабы бастығы, генераллейтенант Сұлтан Камалетдинов, Қорғаныс министрінің орынбасары генерал-майор Шайх-Хасан Жазықбаев, Құрлық әскерлерінің бас қолбасшысы генерал-майор Мереке Көшекбаев, Бас штаб бастығының орынбасары генерал-майор Асан Жүсіпов және облыс әкімі Ербол Қарашөкеев, «Оңтүстік» өңірлік қолбасшылығының басшылығы, әскери қызметшілер мен Қарулы Күштердің ардагерлері қатысты.
Іс-шара соғыс батырлары, аңыз қолбасшылар Сағадат Нұрмағамбетов пен Бауыржан Момышұлының е скерткіштеріне гүл қою рәсімінен басталды. Жеке құрамды құттықтау барысында генерал лейтенант Сұлтан Камалетдинов «Оңтүстік» өңірлік қолбасшылығының әскери қызметшілері антқа адалдықтың, бірліктің және жоғары кәсібиліктің үлгісі екенін атап өтті.
– Жиырма бес жыл – бұл мыңдаған әскери қызметшілер мен офицерлердің қажырлы еңбегі мен жаттығу жылдары. Сіздер бүгінде мемлекеттің қауіпсіздігі мен азаматтардың тыныштығын қамтамасыз етіп, даңқты дәстүрлерді абыроймен жалғастырып келесіздер, – деді генерал-лейтенант.
Айта кетейік, бұл күні «Даңқ» мұражайында жаңа экспозиция ашылып, естелік стела мен болашақ әскери қызметшілерге арналған уақыт капсуласы қойылды. Сонымен қатар заманауи қару-жарақ пен әскери техниканың үлгілері көрсетілсе, штаб аумағында ағаштар отырғызылды. Мұнан соң өнерлі әскери қызметшілердің қатысуымен концерт өтті.
Жалпы, «Оңтүстік» өңірлік қолбасшылығының даму жолы жайлы сөз қозғалғанда «Даңқ» және «Айбын» ордендерінің иегері, генералмайор Әлихан Жарболовтың е сімі айрықша аталады. Оңтүстік әскери округі дәл осы Әлихан Бірімжанұлының басшылығымен құрылғаны әмбеге аян. Кейінгі жылдары Оңтүстік әскери округімен «Оңтүстік» өңірлік қолбасшылығының сарбаздарын Уәли Еламанов, Бахтияр Сыздықов пен Болат Дарбеков, Талғат Қойбақов, Мереке Көшекбаев және Жақсылық Үштаев секілді генералдар басқарды.
Бұл қолбасшылар өздерінің кәсібилігі мен бай тәжірибесі арқасында Қазақстан Қарулы Күштерінің қорғаныс қабілетін нығайтуға зор үлес қосты. Бүгінде бірлестікті генерал-майор Ержан Ыбыраев басқарады. Оның жетекшілігімен «Оңтүстік» өңірлік қолбасшылығы жауынгерлік әлеуетін нығайтып, әскерді дайындаудың заманауи тәсілдерін дамыту үстінде.
Еске салайық, «Оңтүстік» өңірлік қолбасшылығы 2000 жылғы 15 қыркүйекте Қазақстан Президентінің Жарлығымен құрылды. 2003 жылы округ өңірлік қолбасшылыққа айналған әскери округте қайта орналастыру, құрамаларды жасақтау және жаңа міндеттерге бейімдеу бағытында ауқымды жұмыстар жүйелі жүзеге асқан.
Есен ӨТЕУЛІ
Ұқсас жаңалықтар
