Облыс әкімі Ербол Шырақпайұлы Мемлекет басшысы ел экономикасын жаңғыртудың басты тетігі ретінде жаппай цифрландыру мен жасанды интеллектіні дамыту бағытын айқындап бергенін, бұл еңбек өнімділігін арттыруға, мемлекеттік басқарудағы бюрократияны азайтуға, тиімділікті көтеруге және жүйеге сапалы серпін беруге жол ашатынын атап өтті.

– Президент алдағы үш жылда Қазақстан цифрлық мемлекетке айналуы тиіс екенін атап өтіп, ең алдымен Цифрлық кодексті қабылдауды жеделдетуді тапсырды. Сондай-ақ осы салаға жүйелі басшылық жасау үшін Премьер-министрдің орынбасары деңгейінде құрылым қалыптастыруды және Жасанды интеллект пен цифрлық даму министрлігін құруды міндеттеді. Сондай-ақ 7 стратегиялық мақсатты нақтылап, олардың әрқайсысы елдің әлеуметтік-экономикалық дамуына және ұзақмерзімді тұрақтылыққа қызмет ететінін айтты. Цифрлық активтердің толыққанды инфрақұрылымын қалыптастыру, цифрлық теңгені енгізу, Ұлттық банктің қолдауымен арнайы құрылым құру, алғашқы толық цифрланған қала – «Alatau City» жобасын жүзеге асыру осының айқын көрінісі. Smart City технологиялары енгізіліп, тауар мен қызмет ақысын криптовалютамен төлеу мүмкіндігі қарастырылмақ. Білім беру саласында жасанды интеллектіні оқытуға арналған оқу материалдары әзірленіп, қашықтықтан оқыту жүйесі жаңғыртылады. Президент жасанды интеллектіні биологиялық барлау, ауыл шаруашылығы, кеден, логистика, құрылыс және су ресурстарын басқару сияқты салаларда кеңінен қолдану қажеттігін атап өтті. Сонымен қатар инвестициялық ахуалды жақсарту, кәсіпкерлікті қолдау және бизнес құқығын қорғау мәселелері көтерілді. Прокуратура қайтарған активтердің есебінен елімізде 10 мектеп, 4 спорт ғимараты салынатыны, 235 денсаулық сақтау нысаны мен 177 су нысанының құрылысы мен жөндеу жұмыстары жүргізілетіні мәлім болды, – деді Ербол Шырақпайұлы.

Бұдан кейін облыс әкімдігі экономика және бюджеттік жоспарлау басқармасының басшысы Сандуғаш Абдралиева баяндама жасап, өңірде ауыл шаруашылығы саласын дамытуға 32,4 миллиард теңге көлемінде субсидия бөлінгенін жеткізді. Оның айтуынша, Солтүстік Қазақстан облысының тәжірибесін кеңейту аясында 13 жоба жүзеге асырылмақ. Сонымен қатар шағын және орта бизнес субъектілерінің жалпы өнім шығару көлемі 323,3 миллиард теңгені құрап, бұл көрсеткіш 106,1 пайызға жеткен.

Қазіргі таңда облыста жұмыс істеп тұрған шағын және орта бизнес субъектілерінің саны 107,8 мың бірлікті құрайды екен. Онда 163,5 мың адам еңбек етуде. Өз сөзінде Сандуғаш Ермаханқызы алдағы уақытта облыстың стратегиялық және бюджеттік жоспарлау саясаты Мемлекет басшысының Жолдауында айқындалған міндеттерді орындауға бағытталатынын тілге тиек етті. Ал облыс әкімдігі цифрландыру және архивтер басқармасының басшысы Шалқар Амантұров өзге де салалардағы жетістіктерге тоқталды.

Өз кезегінде облыс әкімі спикерге цифрландыру ісінде жұмыс нәтижелі болуы үшін жаңа ұсынымдар әзірлеуді тапсырды. Сондай-ақ жиын барысында бірқатар басқарма басшысы баяндама жасап, өз салалары бойынша жеткен жетістіктер мен жүйелі жұмыстарға қатысты маңызды мәліметтермен бөлісті.

Облыстық мәслихат төрағасының міндетін атқарушы Фарида Жүнісова Жолдауда белгіленген міндеттер – алдағы жылдардың нақты іс-қимыл жоспары екенін баса айта келіп:

«Жамбыл облысы да реформаларды өңірлік деңгейде сапалы орындап, жаңа технологияларды енгізу арқылы әлеуметтік тұрғыдан әділетті аймаққа айналуға тиіс», – деді.

Басқосу соңында облыс әкімі Ербол Қарашөкеев барлық мемлекеттік органдарды бірлесе жұмыс істеуге шақырып, Жолдаудан туындайтын экономикалық және әлеуметтік міндеттердің сапалы әрі мерзімінде орындалуын қамтамасыз ету мақсатында республикалық деңгейде тиісті іс-шаралар жоспары әзірленетінін жеткізді. Сондай-ақ ол облыстық деңгейде де тиісті жоспар құрылатынын атап өтті. Айта кетейік, бұл бағыттағы жоспарлы жұмысты үйлестіру экономика және бюджеттік жоспарлау басқармасына тапсырылса, оны бақылау міндеті облыс әкімінің бірінші орынбасары Нұржан Календеровке жүктелді.

Есен ӨТЕУЛІ