Конституция күні қарсаңында Шерхан Мұртаза атындағы «Руханият және тарихтану» орталығында «Тәртіпке бағынған ел құл болмайды» тақырыбында дөңгелек үстел ұйымдастырылды. Жиынға облыстық кәмелетке толмағандардың істері жөніндегі мамандандырылған ауданаралық соты әкімшісінің басшысы Ж.Шыршықбаев, өңірлік Әділет департаментінің бас маманы Р.Балықов және мәдениет пен білім саласының қызметкерлері қатысты.   

Басқосу барысында ең әуелі облыстық кәмелетке толмағандардың істері жөніндегі мамандандырылған ауданаралық соты әкімшісінің басшысы Ж Оразбнкұлы «Конституция – келешек кепілі» тақырыбында баяндама жасап, Конституция – өркениетті болашаққа жол ашатын, халқымыздың игілігіне қызмет ететін Ата Заң екенін атап өтті. Сондай-ақ, ол өз сөзінде Конституция – мемлекеттің қоғамдық және саяси құрылымын, билік тармақтарының өзара жұмыс істеу қағидаттарын және азаматтардың негізгі құқықтары мен бостандықтарын бекітетін басты құжат болып саналатындығын жеткізді. 

Ал өңірлік Әділет департаментінің бас маманы Р.Балықов «Конституция» тақырыбында баяндама жасаса, бір ел болып қолға алған реформалар Конституциямыздың жасампаз рухын күшейте түскенін және бұл кезең еліміздің тарихында түбегейлі жаңғыру кезеңі болып қалатынына кеңінен тоқталды.

Шара соңында қатысушылар тақырып бойынша өзара пікір алмасып, көкейкесті сұрақтарға толыққанды жауап алды. 

 
Жамбыл облысы кәмелетке толмағандардың істері жөніндегі мамандандырылған ауданаралық сотының баспасөз қызметі