Тазалық акциясы әлі де жалғасып жатыр. Тараз қаласы әкімдігінің ішкі саясат бөлімі, «Жастар ресурстық орталығы» «Жасыл ел» еңбек жасақтарымен бірлесіп, шаһар ішінде сенбілік өткізді. Оған облыстық жастар ресурстық орталығының қызметкерлерімен қатар, Тараз қаласының белсенді жастары, еріктілер, жастар ұйымдары қатысты. Бас-аяғы 60-қа жуық белсенді жас атсалысқан акция бұл жолы облыстық және қалалық балалар ауруханасы маңында ұйымдастырылды.
Табиғатты аялау, экологиялық мәдениетті арттыру, жастардың қоршаған ортаға деген жауапкершілігін қалыптастыру мақсатында өткізілген тазалық акциясы ұйымдастырушылардың айтуынша мұнымен тоқтап қалмайды.
– Бүгінгі сенбілікке де жастарымыз белсенді үлес қосты. Қоршаған орта қоқыстан тазартылып, балалар ауруханасының маңайы абаттандырылды. Экологиялық мәдениет бойынша түсіндіру жұмыстары жүргізілді. Әрине, «Жастар жүрген жер мереке» деп бекер айтылмайды. Тазалық акциясын да олар әндете жүріп, қызықты думанға айналдырды. Жастар бұл акцияны уақытша науқан емес, тұрақты экологиялық жауапкершілік ретінде қабылдап отыр. Бұған дейін де «Таза өлке», «Киелі мекен», «Жасыл аймақ», «Өнегелі ұрпақ», «Мөлдір бұлақ» сынды жобалар тұрақты түрде жүзеге асырылғанын білесіздер. Бұдан кейін ортақ үйіміздің тазалығы, табиғаттың саулығы үшін экологиялық акция жалғасын таба бермек, – дейді Тараз қалалық жастар ресурстық орталығының директоры Абзал Есіркепов.
Қамар ҚАРАСАЕВА
Ұқсас жаңалықтар
