Биыл мемлекетіміздің Конституциясына 30 жыл толып отыр. Алдағы Конституция күні қарсаңында Меркі ауданының Ақжол ауылдық мәдениет үйінде «Ардың шыңы – Ата Заң» атты патриоттық кеш өтті. Аудандық аурухана және Ақжол, Андас, Сарымолдаев, Тәтті, Сыпатай, Қызыл-қыстақ, Жеміс-жидек ауылдық кітапханаларының ұйымдастыруымен өткен іс-шара барысында кітапхана оқырмандары патриоттық өлеңдерді мәнерлеп оқып, әннен шашу шашты.
Сыпатай ауылдық кітапханасының кітапханашысы Гүлбану Абдықалыкова «Азат елдің ар-намысы – Ата Заң» атты кітап көрмесімен таныстырды. Кеш соңында Меркі аудандық орталықтандырылған кітапханалар жүйесінің директоры Жанат Суюмкулова тұрғындардың құқықтық сауатын арттыруға бағытталған кітапханалардағы іс-шаралар жөнінде айтты.
– Орталықтандырылған кітапханалар жүйесінің кітапханалары Конституцияның 30 жылдығын түрлі форматтағы іс-шаралармен атап өте отырып, халықтың құқықтық сауаттылығын арттыруды мақсат етуде. Осы мақсаттағы мәдени көпшілік іс-шара, міне Ақжол ауылынан бастау алды. Конституция әрбір азаматтың өмір сүру, білім алу, еңбек ету, ар-ождан мен сөз бостандығына құқығын бекітіп қана қоймай, мемлекет пен қоғамның дамуына да бағыт береді. Бүгінде Қазақстан Республикасының Конституциясы – ел бірлігінің символы, тәуелсіздіктің тірегі. Қорыта айтқанда, Конституцияның 30 жылдығы – бұл тарихи оқиға ғана емес, елдің даму жолындағы жаңа кезеңнің бастауы. Ата Заңға деген құрмет – Отанды қастерлеу. Сондықтан әрбір қазақстандық Конституцияның мәнін терең түсініп, оның нормаларын орындауға үлес қосуы қажет. Осылайша біз әділетті, дамыған және біртұтас Қазақстанды бірге құра аламыз, – деді Жанат Батырбекқызы.
Патриоттық кештің жоғары деңгейде өтуіне атсалысқан барлық қатысушылар Алғыс хатпен марапатталды.
Айман БҮРКІТБАЕВА
аудандық орталықтандырылған кітапханалар жүйесі директорының орынбасары.
Меркі ауданы
Ұқсас жаңалықтар
