Бүгінде халықты әлеуметтік инфрақұрылыммен қамтамасыз ету мемлекеттің басты бағыттарының бірі. Аталған бағытта Қордай ауданында да қарқынды жұмыстар жүргізілуде. Мәселен, инженерлік инфрақұрылымын дамыту мақсатында ауданда бірқатар жобалар қолға алынған. Бұл жайында өңірлік коммуникациялар қызметі алаңында аудан әкімінің орынбасары Дамира Сүгірбай айтты.
Аудан орынбасарының сөзінше, аумақта 41 елді мекеннің 36-сы газбен қамтылған. Ал «Ауыл – ел бесігі» жобасы аясында ауылдық елді мекендердің даму әлеуетін арттырып, тұрғындардың өмір сүру сапасын жақсартуға бағытталған 12 жоба жүргізілуде.
– Атап айтқанда, Қақпатас ауылында жаңа мәдениет үйінің құрылысы жүргізіліп, Үлкен Сұлутөр ауылында заманауи спорт кешені бой көтеруде. Сонымен бірге Сортөбе ауылында бір ауысымда 200 адамға қызмет көрсетуге қауқарлы емхана салынып жатыр. Биыл жыл басынан бері Үлкен-Сұлутөр ауылында дәрігерлік амбулатория, Сарыбұлақ, Еңбек, Бәйтерек ауылдарында жаңа су құбыры қолданысқа берілді. Сәуір айында Керу ауылына газ құбырының құрылысы аяқталып, тұрғын үйлерге қосылды. Ал Бел, Мұзбел, Аңырақай, Бәйтерек ауылдарының ауылішілік газ құбыры құрылысын жүргізу үшін жобалық-сметалық құжаттама әзірленіп, энергетика басқармасына бюджеттік өтінім тапсырылды, – дейді Дамира Сүгірбай.
Сонымен қатар ауданда Гвардейск қалашығының инженерлік инфрақұрылымын дамыту мақсатында 6 жоба қолға алынған. Бұл бағытта жаңа қазандық салу мен жылу желілерін ауыстыру, сумен жабдықтау желілерін қайта құру, газбен жабдықтау, теміржол арқылы өтетін көпір салу және кәріз тазарту құрылымдарын қайта жаңғырту жұмыстары жоспарланған. Аталған алты жобаның жобалық-сметалық құжаттамаларын әзірлеу үшін мемлекет тарапынан 242,6 миллион теңге бөлінген.
Сонымен қатар ауданда Мемлекет басшысының 2025 жылға дейін елді мекендерді 100 пайыз сапалы ауыз сумен қамту тапсырмасы бойынша аудан әкімдігі тарапынан 8,6 миллиард теңгеге 10 ауыз су желілерінің құрылыстары аяқталған.
– Бүгінгі күнге Шарбақты, Күнбатыс-2, Алға және Гвардейск елді мекендерінде су құбырының құрылыстары жүргізілуде. Сонымен қатар Қарасай батыр, Қызылсай, Керу, Көктөбе, Сұлутөр, Үлкен Сұлутөр, Кенен, Бел, Жаңатұрмыс, Күнбатыс-1 секілді он елді мекенді таза ауыз сумен қамтамасыз ету мақсатында жобалық-сметалық құжаттамаларын әзірлеу үшін келісімшарттар жасалды, – дейді Дамира Маратқызы.
Аудан әкімі орынбасарының сөзінше, бүгінде ауданда жалпы ұзындығы 24,7 шақырымды құрайтын 42 көшеге орташа жөндеу жұмыстары жүргізілуде.
Нұрболат АМАНБЕК
Қордай ауданы
Ұқсас жаңалықтар
