Ұлы Отан соғысының ардагері, Тараз қаласының тұрғыны Геннадий Ивановтың биылғы 99 жасқа толған мерейтойы атаусыз қалған жоқ. Қуаныш иесін төл мерекесінде авиация генерал-лейтенанты Дәурен Қосанов пен Тараз қаласы қорғаныс істері жөніндегі басқармасының басшысы, подполковник Ербол Өтебаев арнайы құттықтап келіп, майдангерге Қорғаныс министрінің Алғыс хатын табыстады.
Дәурен Қосанов өз құттықтауында: «Сізді Қарулы күштердің жеке құрамы және өз атымнан шын жүректен құттықтаймын! Сіз – жеңімпаз буынның өкілісіз. Өйткені сіздерге соғыстың азабын көріп, одан кейінгі елдің ауыр жағдайын қиранды күйден көтеріп, жақсарту үшін көп еңбектенуге тура келді. Сіздің өмір жолыңыз – нағыз отансүйгіштіктің, елге адал қызмет етудің үлгісі.
Ұлы Отан соғысындағы Жеңістің 80 жылдығы бізге сіздің ерлігіңізді, қаһармандығыңызды және төзімділігіңізді еске салады. Сол сіздер жасаған ерліктің арқасында біз бүгін бейбіт өмір сүрудеміз» деп атап көрсетті.
Әскери қызметшілердің шынайы және салтанатты құттықтаулары ардагер үшін оның ерлігі ешқашанда ұмытылмайтындығының айғағы болды. Бұл күні оның шаңырағында ізетке толы нешеме жақсы тілектер айтылды, Геннадий Иванович те өзіне көрсетілген құрметке ризашылығын білдіріп, Қорғаныс министріне және офицерлерге алғыс айтты. Геннадий Иванов 1926 жылы 8 шілдеде Кемерово облысының Яшкин ауданында дүниеге келген.
1943 жылы қарашада Кемерово педагогикалық мектебін бітіргеннен кейін бірден 17 жасар бала Қызыл армияға шақырылды. Ол жас жауынгер курсынан Красноярск өлкесінің Мантис қаласында 43-ші атқыштар бригадасында өтті, содан кейін майданға жіберілді.
1944 жылдың қарашасынан бастап Геннадий Иванович 1-Украина майданында 13-армияның 350-атқыштар дивизиясының 917-зеңбірекартиллериялық полкінің құрамында шайқасты. Аға сержант шенінде ол 120 миллиметрлік минометтің есептеу командирі, содан кейін командирі болды. Геннадий Иванович өз полкінің құрамында Берлинге жетіп, 1945 жылы маусымда соғыстан оралды. Жеңістен кейін ол Борович әскери жалпы әскери училищесін бітіріп, лейтенант атағын алды және армияда рота командирінің саяси бөлім бойынша орынбасары қызметін жалғастырды.
1956 жылы қыркүйекте 10 жылдан астам қызмет еткеннен кейін ол запасқа шығып, Жамбыл қаласына (қазіргі Тараз) көшіп келді, осында педагогикалық институтты бітіріп, 1986 жылы зейнеткерлікке шыққанға дейін жергілікті мектептерде математика пәнінің мұғалімі болып жұмыс істеді. Егде тартқан жасына қарамастан ардагердің көңіл-күйі көңіл қуантарлық. Оған қазір өзімен бірге тұратын қызы Наталья қарайды. Ардагерге немерелері мен шөберелері, сондай-ақ жергілікті әскери басқару органдардың қызметшілері мен ардагерлер ұйымдарының өкілдері жиі келіп тұрады.
«Әркім күн сайын толық өмір сүруі керек: өмірден ләззат алуы үшін, жақындарын қуантуы үшін», – дейді Геннадий Иванович.
Талғат ТАЛАПҰЛЫ
Ұқсас жаңалықтар
