Елімізге есімі белгілі азаматтармен жерлесіміз деп мақтану былай тұрсын, олардың жазған еңбектерін оқып жүру де – зор қуаныш. Сондай ардақты азаматтың бірі – Ұлы Отан соғысының ардагері, әдебиет зерттеушісі Балтабай Адамбаев. Қазіргі таңда бірқатар қалалар мен аудандарда ол кісінің есімі көшелерге және мектептерге берілген.
Сарысу аудандық тарихи-өлкетану музейінде танымал тұлғаның талай жыл өз қолымен басып жұмыс істеген жазу машинкасы сақтаулы. Жалпы, машинканың соңғы рет қолданылғанына 35-40 жылдың көлемі болған. Ал аталған машинка есімі елге белгілі тұлға Балтабай Адамбаевтың өзі пайдалануымен бағалы болып тұр.
Жәдігерді әдебиетші ғалымның жұбайы Жаңылхан Адамбаева 2001 жылы аталған аудандағы Балтабай Адамбаев мектебіне өткізген. Ал, 2006 жылы аталған мектеп әкімшілігі және Адамбаевтар әулеті бұл машинканың аудандық тарихи-өлкетану музейінде тұрғаны дұрыс деген шешімге келген. Сол жылдан бері жазу машинкасы аудандық музейдің құнды жәдігеріне айналып отыр. Бұл туралы аталған музейдің директоры Эльмира Көкішеваның айтары бар.
«Әрине, біз үшін музейдегі барлық зат құнды. Бәрінің өзіндік құны мен тарихы бар. Ал Адамбаев ақсақалдың машинкасы өте ерекше. Тоқпен істейді. Онымен танымал зерттеушінің өзі жұмыс істеген. Бәлкім, біздің музейімізде тұрған «Жауынгер» атты майдан тақырыбынан жазылған кітабын осы машинкамен жазған болар. Қалай болғанда да ел басына күн туғанда Отан үшін от кешкен, бейбіт күнде қазақ әдебиетінің дамуына үлкен үлесін қосқан жерлесіміздің мұрасы асыл тастай бағалы», – дейді ол.
Кешегі жылдар – бүгінгі тарих. Тарихқа айналып бара жатқан жазу машинкалары жас буын үшін әсерлі. Балтабай Адамбаев қолданған жазу машинкасын тамашалайтын жастар мен мектеп оқушылары аз емес.
Есет ДОСАЛЫ
Сарысу ауданы
Ұқсас жаңалықтар
