Д. А. Қонаев атындағы облыстық балалар мен жасөспірімдер кітапханасы «Eco Land» жобасы аясында табиғатты сүюге баулу, экологиялық мәдениетті қалыптастыру және балалардың логикалық ойлау мен топта жұмыс істеу дағдыларын дамыту мақсатында ерекше іс-шара ұйымдастырды. Шара «Мөлдір бұлақ» оқу-сауықтыру орталығында өтті.
Экологиялық білім мен тапқырлық сыналатын «Табиғат білгіштері» атты викториналық ойын барысында қатысушылар «Жасыл әлем», «Табиғат сақшылары» және «Eco-Шаңырақ» атты үш топқа бөлінді.
Әр топ өз ұранымен таныстырылып, бір-бірінен оза шауып, табиғат туралы мақалмәтелдердің жалғасын тауып, жұмбақтардың шешуін тапты. Балалар тек білім жағынан емес, спорттық белсенділік арқылы да сынға түсіп, табиғатты қорғауға арналған суреттер салып, оларды әсерлі түрде қорғап шықты.
Іс-шара соңында кітапханашылар экология тақырыбына арналған жаңа кітаптар мен журналдарды таныстырып, балаларды кітап оқуға ынталандырды. Белсенділік танытқан бүлдіршіндер алғыс хаттармен және арнайы сыйлықтармен марапатталды. Бұл күн жас оқырмандар үшін әрі көңілді, әрі танымдық мәні зор сәттерге толы болды.
Aq jol-Аqparat.
Ұқсас жаңалықтар
