Акцияның мақсаты – балалардың терезеден құлау оқиғаларының алдын алу және тұрғындар арасында қауіпсіздік мәдениетін қалыптастыру. Шараға қалалық төтенше жағдайлар басқармасы мен №20 өрт сөндіру бөлімінің өрт сөндірушілері қатысты. «Ұлы дала» шағынауданының тұрғындарына төтенше жағдай кезінде құтқарушылардың қалай әрекет ететіні көрсетіліп, тұрмыстық қауіпсіздік ережелері түсіндірілді.

Әсіресе терезе мен балкондармен байланысты қауіпсіздік шараларына ерекше назар аударылды. Балаларға үйде абай болудың маңыздылығы айтылып, ата-аналарға кәмелетке толмағандардың қауіпсіздігі үшін жауапкершілік ескертілді. Осы ретте құтқарушылар ата-аналарға жаз мезгілінде балалардың терезеден құлап кетуіне байланысты қайғылы жағдайлар жиі тіркелетінін айтып, ашық терезелер мен масаға арналған торлар балалар үшін аса қауіпті екенін ескертті.

Мәселен масаға арналған тор баланы ұстап қала алмайды, ол жалған қауіпсіздік сезімін тудырады. Балаларды әсіресе терезесі ашық бөлмелерде ешқашан қараусыз қалдыруға болмайды. Терезеге арнайы бекіткіш немесе құлып орнатып, балалар терезеге шығып кетпеуі үшін жиһазды алыс жерге қойған жөн. Балаларды қорғаңыздар, бір ғана сәттік салғырттық орны толмас қайғы әкелуі мүмкін.

Мұндай іс-шаралардың тұрмыстық жарақаттың алдын алуға және балалар қауіпсіздігі мәселелері бойынша халықтың хабардарлығын арттыруға зор үлес қосатыны сөзсіз.

Жүрсінгүл ЖАҚЫП