Бүгінде ол депутат. Кәсіпкер. «Шебер шаңырақ» мүгедектер қоғамдық бірлестігінің төрайымы. Анар жайлы жазылып та жүр. Алайда шегі мен шеті жоқ мына ғажап өмірде Анардың өз айтары бар. Оның екі аяғы екі қолы іспеттес. Шаң сүртіп, үйді жинайды, қоңырау шалсаңыз көтереді, аяғымен жіпті өткізіп, көрпені де қабып, көктейді. Құдайдың құдіретімен ерекше осындай қабілеті бар. Бүгінде өмірдің сан соқпағынан өткен Анар Бексұлтанова кәсіпкерлікпен айналысады. Нақтырақ айтсақ қыз жасауын жасап, бірнеше адамды жұмыспен қамтып отыр. Ол ең алғаш «Janome» тігін машинасымен құрақ құрап, көрпе тігуді үйреніпті. Әлі күнге осымен жұмыс істеп, еңбек етеді.

– «Бизнестің жол картасы – 2020» бағдарламасы аясында Үкіметтен берілетін гранттарды ұтып алуға қатысып, бақ сынауға болатындығын құрбыларымнан естігенмін. Өзіме қолайлысы осы-ау деген оймен қыз жасауын тігуді дұрыс көрдім. Осылайша «Атамекен» кәсіпкерлер палатасының мүмкіндігі шектеулі азаматтар арасында ұйымдастырған байқауына қатысып, 3 миллион теңге көлеміндегі грантын жеңіп алдым. Үйімнен шағын тігін цехын ашып, кәсібіме бар ынтаммен кірістім, – дейді Анар.

– 2013 жылдан бері ісмерлікпен айналысамын. Таныстарымнан қарыз ақша алып, тігін машинасы мен керек-жарағын сатып алдым. Көйлек пішіп, кесте тігуге әуелден-ақ икемім бар. Аяғыммен қайшы ұстап, матаны қиямын, оюды да бастырамын. Бұл ісіме екі әпкем көмектеседі. Көрпеге мақта салып, көктейтін солар. «Шеше көрген тон пішер» демекші кішкентай қыздарым Сұлуайым мен Әдемі де әпкелерінің қимылын қалт жібермейді. Бүгінде өздері де тіге береді, – дейді ол.

Арманы асқақ Анар Бексұлтанова өзі секілді жандарға көрпе көктеуді, тігін тігудің қыр-сырын үйретіп жүр. Облыстардан, аудандардан арнайы іздеп келетіндер көп. Ешкімге алақан жаймаған, мүмкіндігім шектеулі деп өзін мүсіркемеген ол «шектеу тек мида ғана» дейді. Оның көктеген көрпелерін көрсеңіз көздің жауын алады. Шындығында ол тігін тігу, құрақ пішудің, сурет салу, үй жұмысын істеу сияқты тірліктерді еш қиындықсыз еркін атқарады. Жасаған дүниелерін көрмелерге қояды.

«Көрпе FEST-2022» мегафестиваліне қатысып, Жаңаөзен қаласына барып қыз-келіншектерге шеберлік сыныбын өткізіп қайтыпты. «Саусақ бірікпей, ине ілікпейді» деген сөз бар. Қоғам дамуы үшін әр адамның еңбекқорлық, адалдық қағидаттарын ұстануы маңызды. Сүйікті істеріңізбен айналыса отырып, ақша тауып, ұлттық қол өнердің дамуына үлес қосып жүрген ол тағы бір сөзінде былай дейді.

– Істей алмаймын, қолымнан келмейді деген сөзді мен жалқаулық деп санаймын. Менің тек аяғыммен істеп отырған жұмысты аяқ-қолы сау кез-келген қыз-келіншек жасай алады. Бастысы ниет керек. Жұмыстан қорықпау керек.Талпыныс бар жерде, жеңіс болады, – дейді Анар Бексұлтанова.

Кәсіпкер бүгінде көпке мәлім «Махаббат» көрпелерін де тіге береді. Жұмысқа қажетті маталарды Шымкент пен Бішкек қалаларынан сатып әкеледі екен. Ұлттық қолөнерімізді жаңғыртып, ұрпақтан ұрпаққа мұра ету – Анардың алға қойған мақсаттарының бірі. Аудандағы ісмер қыз келіншектерге арнап өткізіп жүрген шеберлік сағаттарында тігін тігудің қыр-сырын үйретіп жүр.

Шеберлік сабағы нәзік жандыларды ұлттық ою-өрнектерінің түрлерімен таныстыруға және оларды тігуді үйретуге бағытталған. Әр түрлі мата бөлшектерінің түстерін үйлестіріп құрақ құрау – бұл нағыз өнер. «Арқармүйіз» және «Қосмүйіз» өрнектелген құрақ көрпелер мен жастық тысын тігіп, үйретіп жүр. Көрпе тігуде ең алдымен матаның түріне, сапасына және әдемілігіне мән береді екен. Көрпенің сапалы матадан дайындалуы маңызды.

Құрақ көрпе – үйдің сәні, нәсібі мол кәсіп, ұлттық өнер. Оған жастардың қызығушылығы да жоғары. Демек, қызығушылық бар жерде көрпе құрау сан қырлы идеялармен жаңара жетіліп, жалғаса түседі деуге болады. Иә, ісмерлік ұшы – қиыры жоқ өнер.

Эльмира БАЙНАЗАРОВА.