Бұл күнде тактикалық медицинаның мүмкіндігі зор. Әсіресе қауіп-қатер жағдайында – әскери іс-қимылдарда, төтенше жағдайларда және лаңкестікке қарсы операцияларда медициналық көмек көрсететіндер үшін ерекше мәнге ие. Сол себепті Ұлттық ұлан құрылымында 2025 жылғы маңызды бастаманың бірі – тактикалық медицина қызметін құру болды. Жалпы, тактикалық медицина – шұғыл жағдайларда, санаулы минуттар шешуші рөл атқаратын кезде, дәстүрлі азаматтық медицинаның тәсілдері тиімсіз болатын сәттерде көмек көрсету жүйесі.
Осы ретте Ұлттық ұланның әскери қызметшілері қоғамдық қауіпсіздікті қамтамасыз етуге, арнайы операцияларға, лаңкестікке қарсы іс-шараларға, табиғи апаттар мен төтенше жағдайлардың салдарын жоюға қатысатынын айта кеткен жөн. Мұндай жағдайда кәсіби медицина мамандары келгенге дейін алғашқы медициналық көмекті жедел әрі сауатты көрсете білу аса маңызды. Ұлттық ұланда тактикалық медициналық дайындық Tactical Combat Casualty Care (TCCC) халықаралық стандарты бойынша жүргізіледі.
Бұл – ұрыс жағдайында жарақат алғандарға көмек көрсету хаттамасы. Ол құқықтық тәртіп әскерлерінің міндеттеріне бейімделген және үш негізгі кезеңнен тұрады. Атап айтқанда, Care Under Fire – оқ астында көмек көрсету (қан тоқтататын таңғыштар салу, қауіпсіздікті қамтамасыз ету), Tactical Field Care – дала жағдайында көмек көрсету (қан кетуді тоқтату, тыныс алуды қалпына келтіру, жағдайды тұрақтандыру) және Tactical Evacuation Care – эвакуация кезінде көмек (медициналық мекемеге дейін сүйемелдеу және көмек көрсету. Оқыту арнайы оқу орталықтарында өткізіледі.
Бағдарлама теориялық сабақтармен қатар, жауынгерлік жарақаттар мен төтенше жағдай сценарийлерін нақты модельдейтін заманауи тренажерларда практикалық жаттығуларды қамтиды. Тактикалық медициналық дайындық – бір реттік шара емес, ол құқықтық тәртіп әскерін жаңғыртуға бағытталған ұзақмерзімді стратегиялық қадам. Оның мақсаты – әскери бөлімдердің жауынгерлік қабілетін арттыру, жеке құрам арасындағы адам шығынын азайту және әскери ортада медициналық сауаттылық мәдениетін қалыптастыру.
Бұған қоса, Ұлттық ұланның патрульдік қызмет атқаратын әскери қызметшілерінің әрқайсысы алғашқы медициналық көмектің базалық дағдыларына үйретіледі. Бұл жауынгер жарақат алған сәтте немесе бейбіт тұрғын зардап шеккен жағдайда, кәсіби медицина мамандары келгенге дейін дұрыс әрекет ете білу үшін қажет. Тактикалық медицина нұсқаушылары оқу-жаттығу сабақтарын үнемі өткізіп тұрады, оның ішінде шынайы жағдайға барынша жақын ортада далалық жаттығулар ұйымдастырылады.
Бұл – әскери қызметшілердің күйзеліске төзімділігін арттырып, өзінің не өзгенің өміріне төнген қауіпке шұғыл әрекет етуді үйренуге мүмкіндік береді.
Есен ӨТЕУЛІ
Ұқсас жаңалықтар
