Жастар арасындағы ең өзекті мәселелердің бірі – жұмыссыздық. Оны жік-жігімен ажыратар болсақ, ең бірінші толғандыратыны – грант мәселесі. Себебі, көптеген студенттер өздері қалаған мамандықтарына балл саны жетпей, төмен алып, ата-анама салмақ салмайыншы деп көзге көрінген гранттағы мамандыққа түсе салады. Оның салдары туралы тереңірек ойланбайды. Содан не керек, 4 жыл оқып біткен соң диплом да, жұмыс та жайына қалады.
Тағы бір көтеретін мәселе – курс, жылдам оқудың жайы. Қазіргі заман құр жатпайтын заман. 2-3 жұмыс артық етпейді деп жүрген жастарды жиі көресің. Әлеуметтік желілерде неше түрлі курстар сатылып жатады. Оны бәріміз де аңғарғанымыз айдан анық.
Көптеген жастар сол курсты оқып алып, кәсібін дөңгелетіп жатады. Ал сондағы 4 жыл білім алған студенттер қайда қалды? Диплом құнсызданып кеткен бе? Көпшілігі оңай көрінген нәрсеге ұмтылады, тез жеңіл ақша табуды қалайды.
Жастар арасында жұмыссыздық тумас үшін замандастарыма өзің қалаған мамандыққа түс дер едім. Грант үшін керегі жоқ мамандықты оқып уақыт кетіргенше, ертең саған пайда, табыс әкелетін мамандыққа түскенді жөн санаймын. Бәлкім, сен грант үшін түсе салған мамандық бөгде біреудің өмірлік арманы шығар. Бұл жағдайда сен өзіңнің ғана емес, өзгенің де жолын жауып тұрсың. Өзің қалаған мамандыққа түсіп, дипломмен жұмыс істегенге не жетсін?!
Көп оқып, көп іздену керек. Шын еңбек еткен адам ғана жетер ұлы мұратқа. Әрқайсымыз өзіміз армандаған мамандықта білім алып, жастар арасындағы жұмыссыздықтың алдын алайық!
Альмира КЕРІМБАЕВА,
М.Х.Дулати атындағы Тараз университетінің 3-курс студенті
Ұқсас жаңалықтар
