Шахтинск қаласына қарасты Северо-Западный кентінің аумағында орналасқан жасырын зертхананың қызметі тоқтатылды. Онда синтетикалық есірткі өндірілген. Заңсыз айналымнан 6 тоннаға жуық прекурсор мен 35 келі дайын психотроптық зат тәркіленді. Бұл — 1 миллионнан астам дозаға тең. 

Операция барысында Шахтинск қаласының 27 және 29 жастағы екі тұрғыны ұсталды. Тінту кезінде олардың тұрғылықты жерінен 355 канистр химиялық зат, ондаған зертханалық құрылғылар (сорғыш жүйелер, индукциялық плиталар, респираторлар және арнайы техникалар), сондай-ақ қылмыстық мақсатта пайдаланылған деп болжанған үш автокөлік тәркіленді.