Мемлекет басшысының тапсырмасына сәйкес, елімізде халықтың тұрмыс сапасын жақсартуға және шетелден елге қайтарылған заңсыз активтер есебінен инфрақұрылымды дамытуға бағытталған жобаларды жүзеге асыру жалғасуда.
Үкімет Жамбыл облысының Қордай және Талас аудандарында екі дәрігерлік амбулаторияның құрылыс жұмыстарын аяқтауға Арнаулы мемлекеттік қордан 319,5 миллион теңге бөлу туралы шешім қабылдады. Онда тәулігіне 45 келушіге қызмет көрсетіледі. Нысандар «Ауылда денсаулық сақтауды жаңғырту» бағдарламасы аясында салынуда.
Бағдарлама бойынша өңірде 30 нысан құрылысы жоспарланған, оның 28-і пайдалануға берілді. Қалған екеуі биыл тапсырылады. Ұлттық жоба шеңберінде Қазақстанда 655 жаңа мекеме – медициналық және фельдшерлік акушерлік пункттер, дәрігерлік амбулаториялар құрылысы жоспарлануда. Қазіргі уақытта 468 нысанда жұмыс аяқталды.
Алғашқы медициналық санитариялық көмек көрсету мекемелерін салуға және ауруханаларды реконструкциялауға қаражат республикалық бюджеттен бөлінеді. Сонымен қатар қаржыландыру Арнаулы мемлекеттік қор есебінен жүзеге асырылады.
Облыс әкімінің баспасөз қызметі.
Ұқсас жаңалықтар
