– Бүгін Жамбылдың жалынды жастарымен «Әулиеата жауһарлары» атты тарихи танымдық экспедициясы бастау алып отыр. Тарих қойнауынан сыр шертетін киелі Әулиеата өңірінде бұл экспедицияның басталуы маңызды. Тарихи танымдық шаралар қоғам санасын жаңғыртуға зор ықпал ететін озық жобаларға айналуы керек. Сол арқылы жас ұрпақ төл тарихымыз бен салт - дәстүрімізді терең танып, өткеннен тағылым алуы қажет. Жалпы, өңірімізде тарихи-мәдени мұраны сақтау және молайту мақсатында ауқымды әрі үздіксіз жұмыстар жүргізіліп келеді. Бүгінгі тарихи танымдық экспедиция соның айқын дәлелі. Қасиетті Әулиеата өңірі тұнған тарих. Мұнда ежелгі және орта ғасырлар тарихының адам сүйсінер және керемет таңданарлықтай тарихи ескерткіштер сақталып, бүгінгі күнге жеткен, – деді Серік Сәлемов.

Бұдан кейін облыстық ардагерлер кеңесінің төрағасы Еркінбек Солтыбаев жастарға бата берді. Осылайша экспедицияға қатысушылар Бауыржан Момышұлы музейіне кіріп, тарихи жәдігерлермен танысты.

Үш күнге созылатын экспедицияға еріктілер, ЖРО мамандары, ассамблея жастары, аудандық, ауылдық мектептердегі тарих пәнінің мұғалімдері, әртүрлі салада жұмыс істейтін жастар қатысуда.

Айта кетейік, шара аясында жамбылдық жастар Ақыртас кешені, Құлан қалашығы, Меркі қалашығы, Қарасай петроглифтері, Т.Рысқұлов аудандық тарихи музейі, Меркі үңгірі, Меркі аудандық тарихи музейі, «Меркі сегіз» петроглифтерінің тарихымен танысатын болады.

Есет ДОСАЛЫ