«Бала – бауыр етің» деген сөзді жиі қолданамыз. Өйткені өзегіңді жарып, ұйыған қаннан ұядағы балапанға айналған құлыншақтың құдіреті адамның ет жүрегін елжіретіп, жүзіңе қуаныш, жүрегіңе жұбаныш сыйлайтыны анық. Жалпы, бүгінгі таңда мемлекет тарапынан балалардың қауіпсіздігін қамтамасыз етуге көптеп көңіл бөлінуде. Мәселен, бұл мақсатта заңнамалар жетілдіріліп, қажетті шаралар қабылданып жатыр. Балалардың қауіпсіздігін қамтамасыз ету бағытында бірер күн бұрын Байзақ ауданында ұйымдастырылған «Қоғамдық байланыс» акциясы аясында өткен «Қауіпсіз балалық шақ. Болашаққа бағдар» практикалық конференциясының мақсаты осыған саяды.
Жиынға С.Асфендияров атындағы ҚазҰМУ мамандары, мемлекеттік органдардың өкілдері, қоғам қайраткерлері, психологиялық қолдау орталығы мен сарапшылар қатысты. Басқосуда облыс прокуроры Нұрғалым Әбдіров жасөспірімдер өз сезімдері мен мәселелерін ашық талқылай алатын қоғамда да, үйде де қауіпсіз орта құрудың маңыздылығын атап өтті.
Ол өз сөзінде құқық қорғау органдары балалар арасында және оларға қатысты суицид пен құқықбұзушылық жағдайларын, олардың себептері мен шарттарын анықтап, ерекше бақылауда ұстайтынын жеткізді. Бұл ретте сараптамалық қорытынды беретін психологтар мен лауазымды тұлғалардың қатысуымен арнайы комиссия жұмыс істейді екен.
Айта кетейік, былтырғы жылы елімізде Бала құқықтары жөніндегі конвенцияның қабылданғанына 30 жыл толған еді. Рас, осы жылдар ішінде егемен еліміздегі балалардың қауіпсіздігі мен әл ауқатын арттыру жобасы біраз белесті артта қалдырды. Ал қазіргі таңда елімізде балаларды зорлық зомбылықтан қорғау, олардың құқықтары мен әл-ауқатын қамтамасыз ету және суицидтің алдын алу жөніндегі 2023-2025 жылдарға арналған кешенді жоспар тиімді іске асырылып жатыр.
Бұдан бөлек 2024-2025 жылдары профилактикалық жұмыстың жеткіліксіз болғаны үшін 328 адам, оның ішінде 16 басшы, құқықбұзушылықтар мен қылмыстарды жасырғаны үшін 6 азамат әкімшілік және қылмыстық жауапкершілікке тартылыпты.
Есен ӨТЕУЛІ
Ұқсас жаңалықтар
