Басың ауырып, балтырың сыздаса, дәрігерге жеткенше асығасың. Ал мен тағдырдың жазуымен мүгедек болған соң ақ халаттылардың алдына жиі барамын. Дәрігер де, мейірбике де алдына келген науқасты жылы қабақпен қарсы алып, қамқорлығын жақсы сөзімен сездірсе, ауруыңнан айыққандай жағдайың түзеліп сала береді. Мен осындай дәрігерге тап болғаныма қуандым, жан жылуын байқатқан қамқор дәрігерге алғысымды газет арқылы айтып, бәріне үлгі еткім келеді.
Тараз қаласындағы №5 емхананың дәрігері Дана Сәбит көмегіне жүгініп барған жандарға мейірімділік танытып, биязылығымен өзінің ата-анасынан алған тәрбиесінің жоғарылығын көрсетті. «Кішіпейілділік кісіліктен» дейді біздің халық.
Дана Алмасқызы жылы қабылдағанымен қоса, мені басқа кабинеттерге жолдағанда, қасыма медбикесін ертіп жіберіп қолдау көрсетті. Өйтпегенде, емхананың әр қабатындағы кабинеттерді тауып бару да, олардағы мамандарға өз қажетімді ұмытпай жеткізу де оңай болмас еді.
Міне, осындай қамқор да кішіпейіл дәрігерді өзге әріптестеріне үлгі ретінде айтқым келді. Жан жылуы мен жақсы сөз де дертке шипа екенін барлық ақ халаттылар ескерсе екен деген тілегім бар.
Аралбек ТАНБАЕВ,
2-топ мүгедегі, Тараз қаласының тұрғыны.
Ұқсас жаңалықтар
