Филиал директорының айтуынша, әлеуметтік тұрғын үй құрылысы 2023-2029 жылдарға арналған тұрғын үй-коммуналдық инфрақұрылымды дамыту тұжырымдамасы аясында жүзеге асырылмақ. Пәтер сатып алуға арналған несие жылдық 5 пайыз мөлшерлемемен (ЖТСМ 5,2 пайыздан 5,8 пайызға дейін) беріледі.

Бастапқы жарна 10 пайыздан басталады. Мұндай қолжетімді шарттармен пәтерлерді бірінші және екінші топтағы мүгедектігі бар адамдар, мүгедектігі бар балаларды тәрбиелеп отырған немесе асырап отырған отбасылар, ата-ана қамқорлығынсыз қалған жетім балалар, көпбалалы отбасылар, «Алтын алқа», «Күміс алқа» алқаларымен марапатталған аналар, бұрын «Батыр ана» атағын алғандар, сондай-ақ «Ана даңқы» орденінің I және II дәрежелерімен марапатталған аналар, сондай-ақ тұрғын үй кезегінде тұрған өзге де азаматтар ала алады.

– Мәселен, Тараз қаласының «Ұлы дала» шағын ауданында 8 тұрғын үй пайдалануға беріледі. Бұл ауданда бір шаршы метрдің құны 160 мың теңгені құрайды. Тиісінше, бір бөлмелі пәтерлер 6 миллион 592 мың теңгеден, екі бөлмелі – 8 миллион 848 мың, үш бөлмелі – 12 миллион 640 мың, төрт бөлмелі 16 миллион 848 мың теңгеден басталады. Бұдан өзге 3 тұрғын үй жаңа «Сәулет» шағын ауданында салынып жатыр. Мұнда бір шаршы метрдің құны – 226 мың 100 теңге. Бұл шағын аудандағы пәтерлердің бағасына келсек, бір бөлмелі пәтерлер 9 миллион 812 мың 740 теңгеден, екі бөлмелі – 13 миллион 995 мың 590, үш бөлмелі – 18 миллион 653 мың 250, төрт бөлмелі 21 миллион 4 мың 690 теңгеден басталады, – деген Нұрлан Темірбекұлы өткен жылы аталған тұжырымдама аясында облыста 18 нысан бойынша 944 пәтер пайдалануға берілгенін атап өтті.

Филиал басшысы мемлекеттік қолдау аясында жалдау төлемдерінің 50 пайызын субсидиялау түріндегі көмек қандай санаттағы азаматтарға берілетінін айтты. Мәселен, мұндай көмек I және II топтағы мүгедектерге, мүгедек бала тәрбиелеп отырған отбасыларға, көпбалалы отбасыларға және жетім балалар санаты бойынша тұрғын үй кезегінде тұрған азаматтарға көрсетіледі. Оларға қойылатын жалпы талаптар – соңғы алты айдағы отбасының әрбір мүшесіне шаққандағы орташа айлық табыс мөлшері күнкөріс минимумының бір еселенген шамасынан (46228 теңге) аспауы тиіс және «Тұрғын үй қатынастары туралы» заңға сәйкес тұрғын үйге мұқтаж ретінде есепке қойылғанын және тиісті санатқа жататынын растайтын құжаты болуы керек. Осы аталған санаттар бойынша тұрғын үй кезегінде тұрған азаматтар мемлекеттік қолдауға үміткер бола алады.

«Отбасы банк» филиалы директорының сөзінше, азаматтар жалға берілетін тұрғын үйді өзі іздейді. Оның құнын есептеу кезінде бірнеше фактор ескеріледі. Бір шаршы метр үшін жалдау ақысы жыл сайынғы есептік көрсеткіш деңгейіне және өңірге немесе қалаға белгіленген арнайы коэффициентке сәйкес есептеледі. Біздің облыс үшін бұл коэффициент – 2,24.

«Мәселен, біздің облыста бір шаршы метр тұрғын үйдің жалдау құны 1755 теңге болып белгіленген. Осыған сәйкес, бір немесе үш адамнан тұратын отбасы 40 шаршы метрден (70200 теңгеден) аспайтын жалдамалы тұрғын үйді таба алады. Ал 4-5 адамнан тұратын отбасы үшін 60 шаршы метрден (105300 теңге), 6 және одан да көп адамнан тұратын отбасы үшін 80 шаршы метрден аспауы тиіс (140400 теңге). Егер тұрғын үйдің алаңы белгіленген нормадан асып кетсе, артық ауданның ақысын жалға алушы өз есебінен төлейді», – дейді Н.Сұлтанов.

Жүрсінгүл ЖАҚЫП