Кеше осынау акция аясында облыс орталығындағы Шерхан Мұртаза атындағы мектеп-гимназиясында «Жасыл әлемді бірге құрайық!» атты экологиялық акциясы ұйымдастырылды. Шараға облыс әкімі Ербол Қарашөкеев, қала әкімі Бақытжан Орынбеков, білім басқармасының басшысы Нұрбек Оршыбеков пен ұстаздар ұжымы және аталған мектептің 10-сынып оқушылары қатысты.

Сондай-ақ, ZOOM платформасы арқылы онлайн режимде 8 мектеп онлайн қосылды. Шара барысында ең әуелі сөз алған аймақ басшысы Ербол Шырақпайұлы өскелең ұрпаққа табиғат пен қоршаған ортаны қор ғаудың жолдарын ұғындыру, олардың экологиялық сауатын ашу – үздіксіз білім беру нәтижесінде ғана шешілетінін атап өтті. Оның айтуынша, бүгінгі аға буын өкілдері табиғатты қорғауда, сақтауда және оны дұрыс пайдалануда ұрпақ пен тарих алдында жауапты.

– Жеткіншектерге экологиялық тәрбие мен білім беру – олардың дұрыс дүние тану көзқарасын қалыптастырады. Демек, біз қашанда табиғатты аялауға тиіспіз. «Табиғатсыз адамзаттың күні жоқ, оны айтуға табиғаттың тілі жоқ» деп халық даналығында айтылғандай, табиғатты қорғау – біздің міндетіміз. Табиғат – болашақ ұрпаққа қалдырар байлығымыз. Сондықтан, табиғаттың жанашыры болу әр адамның қасиетті борышы екенін біліп жүрейік! – деді облыс әкімі.

Бұдан кейін 8-10-сыныптың оқушыларынан құралған бас-аяғы 200 бала бозарша, арша, шырша және қарағай тұқымдарынан жалпы саны бір мың дана дәнек екті. Соңында аймақ басшысы бұған дейін 7-10-сынып оқушыларының қатысуымен өткен «Мен Қазақстан экологиясын жақсартуға қандай үлес қосамын?» тақырыбындағы облыстық шығармалар конкурсының жеңімпаздарын марапаттады. Жалпы, бұл жарысқа барлығы 2 530 оқушы қатысқан. Оның ішінде 3 үздік шығарма иесі – Т.Рысқұлов ауданынан Нұрали Керімбек, Жуалы ауданынан Айдын Артықбай және Тараз қаласынан Заңғар Айтбай жеңімпаз атанды. Жас экологтарға «Jambyl Cement» компаниясы атынан велосипедтер табысталды.

Есен ӨТЕУЛІ