Облыс әкімі Ербол Қарашөкеев негізгі экономикалық көрсеткіштер туралы баяндады. Жалпы өңірлік өнім өткен жылдың соңында 2,2 триллион теңгені құрады. Өнеркәсіп өнімінің көлемі 188 миллиард теңгеге жетсе, оның 122,5 миллиард теңгесі өңдеу саласына тиесілі. Премьер-министр «Алатау» индустриялық сауда логистикалық кешенін мысалға ала отырып, өңірде экономиканың жаңа өсу бағыттарын қалыптастыру бойынша атқарылып жатқан жұмыстардың барысын тексерді. Қордай ауданында Қазақстан тарапындағы «Қарасу» және Қырғызстан тарапынан «Ақ-Тілек» өткізу бекеттеріне іргелес жатқан индустриялық сауда-логистикалық кешеннің (ИСЛК) аумағын аралады.

Аталған жоба екі мемлекет басшылары Қасым-Жомарт Тоқаев пен Садыр Жапаров қойған өзара тауар айналымын 3 миллиард долларға дейін ұлғайту жөніндегі міндеттері аясында жүзеге асырылуда. Еліміздің Қырғызстандағы Төтенше және Өкілетті Елшісі Рәпіл Жошыбаев пен Қырғыз Республикасының экономика және коммерция министрі Бақыт Сыдықов жүргізіліп жатқан бірлескен жұмыстар туралы айтты.

Бүгінгі таңда сүт, ет, жидек және көкөніс, тоқыма, фармацевтика және басқа да өнімдер өндірісі саласындағы кооперациялық жобалар үшін инфрақұрылым құрылуда. Жаңадан тауарлар өндіру және оларды халықаралық тауар өткізу жүйелеріне тиімді интеграциялау арқылы әрі қарай сату басты мақсат болып отыр. «Romsey Holdings KZ» ЖШС индустриялық кешен компаниясының басқарушы директоры Абзал Мыңбаев индустриялық сауда-логистикалық кешен (ИСЛК) аумағына инвестиция тарту бойынша жүргізіліп жатқан жұмыстар және Қазақстан аумағында ауыл шаруашылығы өнімдерін, пластик ыдыстарды қайта өңдеу, кабельдік өнімдер мен фарфор ыдыстарын дайындайтын өндіріс орындарын ашу туралы жоспарларын баяндады.

Аталған жобалар бойынша инвестициялардың жалпы сомасы шамамен 40 миллиард теңгені құрайды. Сонымен қатар ИСЛК-ті Jibek Joly арнайы экономикалық аймағының қосалқы аймағы ретінде қайта ұйымдастыру жұмыстары жүргізілуде, бұл инвестициялық тартымдылықты арттырады.

«Мемлекет басшысы таяуда өткен кеңесте ел экономикасының өсу қарқыны мен тартылған инвестиция көлемін төмендетпеу міндетін қойды. Ауқымды индустриялық сауда-логистикалық кешеннің құрылуы өнеркәсіптік өндірісті дамытуға, дайын өнімді өткізудің тиімді жүйесін құруға, сондай ақ жаңа жұмыс орындарын ашуға мүмкіндік береді. Бұл бағытта инвестициядан бастап жеткізуге дейінгі барлық тізбек бойынша белсенді жұмыс істеу маңызды. Жобаға жәрдемдесу үшін инженерлік инфрақұрылым мәселелерін мүмкіндігінше қысқа мерзімде шешу қажет», – деп атап өтті Олжас Бектенов.

Сондай-ақ «KORCEM» ЖШС цемент зауытында Премьер-министр өңірдің құрылыс индустриясының дамуымен танысты. Өткен жылы іске қосылған кәсіпорынның өндірістік қуаты жылына 1,3 миллион тонна цементті құрайды. Өнімдер ішкі нарықта сатылады, сонымен қатар Өзбекстан, Ресей және Қырғызстанға экспортталады.

«KORCEM» ЖШС бас директорының орынбасары Станислав Щербаков қалдықтар мен шаң жинау құрылғылардың жоғары сүзу жүйелерін қамтитын озық технологияларды өндірісте қолдану туралы хабардар етті. Зауытта халықаралық стандарттарға сәйкес DCS интеллектуалды жүйесі енгізілді. Барлық технологиялық цикл механикалық үдерістерді басқаруға мүмкіндік беретін орталық басқару пультінен жүзеге асырылады.

Премьер-министр Өнеркәсіп және құрылыс министрлігіне қазақстандық нарықты отандық цементпен қамтамасыз ету және экспорттық нарықтарды кеңейту ісінде зауытқа жәрдемдесуді тапсырды.

ҚАЙТА ӨҢДЕУ – ӘЛЕУЕТТІ АРТТЫРАТЫН МАҢЫЗДЫ ҚАДАМ

Олжас Бектенов облыстағы Jibek Joly арнайы экономикалық аймағындағы жаңа ауқымды инвестициялық жобалардың жүзеге асырылу барысымен танысты. Өңірге жұмыс сапарымен келген Премьер-министр Олжас Бектенов бірқатар жоба аясында Президенттің экономиканы әртараптандыру, өнеркәсіп өндірісі көлемін ұлғайту және экономиканың түрлі салаларында қайта өңдеу қарқынын арттыру жөніндегі тапсырмаларының орындалу барысын тексерді.

Премьер-министрге Jibek Joly арнайы экономикалық аймағының аумағында химия, өңдеу өнеркәсібі, машина жасау, энергетика, металлургия салаларындағы инвестициялық жобалардың жүзеге асырылу барысы, сондай-ақ қажетті инфрақұрылымның дамуы туралы баяндалды. Мұнда барлығы 18 қатысушы тіркелген.

2024 жылдың қорытындысы бойынша өңірге салынған инвестициялар көлемі 506 миллиард теңгені құрады, 2025 жылы 9 жобаны салу нәтижесінде шамамен 850 миллиард теңгеге дейін артады деп күтілуде. Облыс әкімінің орынбасары Әбілхайыр Тамабек АЭА инфрақұрылымын, оның ішінде газ және электрмен жабдықтауды, су құбырын, теміржол кірме жолдарын дамыту туралы баяндады. Қабылданған шаралар салынып жатқан өндіріс орындарының қажеттіліктерін қамтамасыз етуге мүмкіндік береді және жаңа инвестициялық жобаларды іске асыруға негіз қалыптастырады.

Сонымен қатар Премьер-министр жаңадан қолға алынған өнеркәсіп нысандарының, атап айтқанда, толық циклді металлургиялық кешен мен жүгеріні терең өңдейтін зауыт құрылысының барысымен танысты. Аталған жобалар былтырғы қараша айында Олжас Бектеновтің ҚХР ға жұмыс сапары аясында өткен кездесулер мен қол жеткізілген уағдаластықтар шеңберінде жүзеге асырылуда. Қытайлық инвестор Fujian Hengwang Investment Co., Ltd компаниясының қатысуымен жалпы құны шамамен 1,2 миллиард долларды құрайтын еліміздегі ең ірі металлургия зауыттарының бірінің құрылысы басталды.

Жобаны қаржыландыру инвестордың өз қаражаты есебінен жүзеге асырылады. Кәсіпорын арматура, созба сымдар, жолақ және профильді қабылдады болат, сондай-ақ металл өнімдерінің басқа да түрлерін шығарады. Fujian Hengwang Investment Co., Ltd басқарма төрағасы Цзэн Чжаоцянь 2027 жылы бірінші кезеңді іске асыру аясында зауыттың өндіріс қуаты жылына 1 миллион тоннаға жететінін баяндады.

2027–2029 жылдар аралығындағы екінші кезеңде өндіріс көлемін жылына 3 миллион тоннаға дейін жеткізуге мүмкіндік береді. Сондай ақ кәсіпорынның қажеттіліктерін қамтамасыз ету үшін газ турбиналы электр стансасының құрылысы қарастырылған. 2,5 мың жұмыс орнын ашу жоспарланып отыр. Циклдің маңызды элементі – темірді тікелей тотықсыздандыратын қоршаған ортаға зиянсыз технология қолдану.

Қазақстан темір рудасының қоры бойынша әлемде 9-шы орын алады. Өткен жылдың қорытындысына сәйкес, өндіріс көлемі 37 миллион тоннаға жетті. Толық циклді металлургия кешенінің жаңа жобасы отандық металлургияның дамуына айтарлықтай үлес қосып, экологиялық таза технологияларды қолданудың үлгісіне айналады.

«Аталған жоба еліміздегі темір рудасын терең өңдеудің толық циклі бар қара металдар мен металл өнімдерін шығаратын ірі өндірушілердің біріне айналады. Үкімет бұл зауыттың құрылысына жан-жақты қолдау жасап, оның сәтті іске қосылуына қажетті көмек көрсетеді», – деп атап өтті Олжас Бектенов.

Сондай-ақ Премьер-министр жүгеріні терең өңдеу зауытын салу жөніндегі инвестициялық жобаның құрылыс алаңына барды. Инвестиция көлемі 800 миллион долларды құрайды. Өндірістік қуаттылығын жылына 1 миллион тонна жүгеріден әрі қарай 3 миллион тоннаға дейін ұлғайта отырып, тігінен интеграцияланған өнеркәсіп паркін құру жоспарлануда. Жобаны биоферментация индустриясындағы әлемдік көшбасшы – қытайлық Fufeng Group компаниясы жүзеге асыруда. Өнеркәсіп кешен құрамына крахмал зауыты және үш биоферментация кәсіпорны кіреді. Зауыттан: лизин, глутамин, глутамин қышқылы, лейцин, треонин, жем және тағы да басқа жоғары қосылған құны бар өнімдер шығарылады деп күтілуде. Өнеркәсіп паркінің қажеттіліктерін қамтамасыз ету үшін инвестор көмір жылу электр стансасы мен ағынды суларды тазарту стансасын салуды да жоспарлап отыр. Ары қарай тұз қышқылы мен сұйық аммиакты қоса алғанда, химиялық компоненттер шығаратын зауытты іске қосу қарастырылғаны атап өтілді.

Негізгі нысандарды пайдалануға беру 2026 жылға жоспарланған. 1,5 мыңға дейін жұмыс орнын ашу көзделуде. Олжас Бектенов бұл жобаны жүзеге асыру ауыл шаруашылығы өнімдерін қайта өңдеу деңгейін арттыруда, экспорттық әлеуетті дамытуда және заманауи агротехнологияларды тартуда маңызды қадам болатынын атап өтті. Премьер-министр Сарысу ауданында «Qazaq Soda» ЖШС кальцийленген сода шығаратын зауыт құрылысының барысын тексерді. Yildirim Holding атқарушы директоры Исмаил Джейлан мен «Qazaq Soda» ЖШС директоры Рамазан Ибраимов жоба туралы баяндады. 42 гектар алқапта бірінші кезеңде қуаттылығы жылына 500 мың тонна өнім өндіретін өндіріс кешені іске асырылып, кейіннен 1 миллион тоннаға дейін ұлғайтылады.

Жергілікті шикізат пайдаланылатын болады. Өндіріс үдерісінде қалдықтарды нөлдік деңгейде қамтамасыз ететін технологияларды қолдану жоспарлануда. Кальцийленген сода металлургия, шыны, тамақ, тоқыма және химия өнеркәсібінде, сондай-ақ тұрмыстық химия өндірісінде қолданылады. Бүгінде еліміздің содаға деген қажеттілігі жылына 350-400 мың тоннаны құрайды. Жобаны жүзеге асыру импортты толық алмастыруды қамтамасыз етуге және ТМД елдері мен Қытайға экспортты бастауға мүмкіндік береді.

Қазіргі уақытта құрылыс монтаждау жұмыстары 30 пайызға орындалды, негізгі жабдықтарды жеткізу жүзеге асырылуда. Зауытты пайдалануға беру 2026 жылдың тамыз айына жоспарланған. Жоба аясында 1 мың жұмыс орны, оның ішінде 400 тұрақты жұмыс орны ашылады. Инвестициялардың жалпы көлемі шамамен 400 миллион долларды құрайды.

Премьер-министр Қазақстанды әлемдегі жетекші кальцийленген сода өндірушілердің қатарына қосатын, импортқа тәуелділікті төмендететін және еліміздің химия өнеркәсібін дамыту үшін жаңа мүмкіндіктер туғызатын жобаны уақытылы жүзеге асырудың маңыздылығын атап өтті. Аталған жобаны жүзеге асыра отырып, еліміз Қытай, Түркия, АҚШ және Ресей сияқты әлемдегі жетекші сода өндірушілерінің қатарына қосылады.

Облыс әкімінің баспасөз қызметі.