Кеше ҚР Президентінің кеңесшісі Мәлік Отарбаев Байзақ ауданында жұмыс сапарымен болып, аудан тұрғындарымен кездесті. Кездесудің негізгі тақырыбы – Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауының өңірде іске асырылуы болды. Жиынды облыс әкімі аппаратының жетекшісі Лесбек Ілебаев ашып, жүргізіп отырды. Алдымен аудан әкімі Олжас Баққараев Жолдауда берілген тапсырмалардың орындалуы туралы айтты. Биыл ауданға тартылған инвестиция 23,9 миллиард теңгені құрап, өткен жылдың тиісті кезеңімен салыстырғанда 13 пайызға артқан. Өндірістік қуатты арттыру және өңдеу саласын қолдау бағытындағы 32 жобаның 12-і аяқталып, қалғанын жыл соңына дейін жүзеге асыру көзделуде. 40 елді мекеннің 38-і орталықтандырылған таза ауыз су жүйесіне қосылған. Қазіргі таңда Төрткөл, Жаңасаз және Қосақ ауылдарында таза ауыз су жүйесін орнату жұмыстары жүргізілуде. Жыл соңына дейін аудан халқы 100 пайыз таза ауыз сумен қамтылады. 2024 жылы көпқабатты 4 тұрғын үй пайдалануға берілген. Сондайақ Сарыкемер ауылында әлеуметтік осал топтағы азаматтарға 40 үй пайдалануға берілді, ал қосымша 196 пәтердің құрылысы жүргізілуде, оның ішінде 114 пәтердің құрылысы аяқталған. Кездесу барысында аудандық мәслихаттың төрағасы Бақтияр Ақбаев пен Қостөбе ауылдық округінің әкімі Мұхтар Мамышев баяндама жасады.