Оның сөзінше, жыл басынан бері құқықбұзушылықтың алдын алу және қылмысқа қарсы күрес бойынша жедел профилактикалық іс-шаралар кешенін жүргізу кезінде ауданда барлығы 23 қылмыс тіркелген. Бұл көрсеткіш өткен жылы екі есе көп болатын. Сондай-ақ, ауыр және аса ауыр қылмыстар 40-тан 18-ге, оның ішінде ауыр қылмыстар 16-дан 1-ге, ауырлығы орташа қылмыстар 16-дан 8-ге азайған.

– Жол-көлік оқиғасының алын алу бойынша «Қауіпсіз жол», «Жолдардағы балалардың қауіпсіздігі» атты профилактикалық жұмыстар үздіксіз жүргізілуде. Айталық, жол ережесін бұзудың 1 149 фактісі анықталған, оның ішінде мас күйінде көлікті басқарған 4 азаматқа тиісті тәртіптік шара қолданылды. Қылмыстардың алдын алу мақсатында полиция күштері есепке алынатын адамдарды, бұрын сотталғандарды тексеру бойынша жұмысын пысықтауда. Сонымен қатар, малды паспорттау және чиптеу, заңсыз иммигранттар мен бұрын сотталған малшыларды анықтау үшін жергілікті әкімдік пен ветеринарлық қызмет өкілдері арасынан жұмыс топтары құрылып, шаруа қожалықтарымен үшжақты шартты ресімдеу бойынша жұмыс жалғасуда. Халық көп жиналатын жерлерде интернет-алаяқтық қылмыстарының алдын алу шаралары үнемі түсіндіріліп, ескерту буклеттері ілініп, фото және бейнежазбалары бар профилактикалық іс-шаралар тұрақты түрде ұйымдастырылуда. Нәтижесінде, өткен жылдың есепті кезеңімен салыстырғанда қылмыстар едәуір азайып отыр, – деді Дәурен Нұржанұлы.

Атап өтерлігі, жүргізілген жедел профилактикалық іс- шаралардың нәтижесінде қоғамдық орындарда, көшелерде және қару қолдану арқылы жасалған қылмыстар саны да 50 пайызға төмендеген.

Нұрболат АМАНБЕК

Жамбыл ауданы