Республикалық ақындар айтысының жүлдегері Рай Дөңбай және «Асыл» домбыраның иегері Дархан Әбдіманат мерекеге арналған арнауын ұсынды. «Нақыш» тобының орындауында «Бозжорға», «Көк жөтел», «Мен қазақпын» әндері тыңдалды. Сондай-ақ, елімізге танымал әншілер, кеш қонақтары Заттыбек Көпбосынұлы мен Әділет Жауғашар өнер көрсетіп, көрерменнің ыстық ықыласына бөленді.

Әр киіз үйде наурыз көже дайындалып, ыстық бауырсақтар пісіріліп, асылған қазанның буы төгіліп жатты. Ұлттық салт-дәстүрімізді ұлықтай отырып, мектепке дейінгі білім беру мекемелерінің тарапынан «Қыз ұзату», «Беташар», «Бесік той», «Тұсау кесер», «Тоқым қағар» сынды дәстүрлердің орындалуы халықты одан әрі шаттандырды.

Қой көтеру сайысында Мәдімар ауылының азаматы өзі 70 рет көтерген қойды бас жүлдеге ұтып алды.

Есет ДОСАЛЫ

Байзақ ауданы